Home Politica “Apesar cu CAFT a supervisa gobierno di AVP durante 2 aña, cos...

“Apesar cu CAFT a supervisa gobierno di AVP durante 2 aña, cos a bira peor”

236
0
SHARE
- Advertisement -

Adi Thijsen:

ORANJESTAD(AAN): Diaranzon partido MEP a tene un conferencia di prensa, den cual Adi Thijsen a papia tocante di asuntonan den Reino Hulandes.

“Ayera tabata 10-10, cu ta un dia cu a bay den historia di Reino Hulandes, pasobra 7 aña pasa e pais Antillas a wordo desmantela, unda cu Corsow y St. Maarten a bira paisnan autonomo, mientras cu Bonaire, St. Eustatius y Saba a bira asina ‘Openbare lichamen’ den Reino”.

“Esaki tabata tin consecuencia pa nos tur, incluyendo Aruba”.

“Mi kier a felicita nan, pero cu sentimento mixto, pasobra den e proceso aki cu nos ta canando, tin hopi inhusticia”.

“Mi no ta bay den detaye, pero ora cu nos biba den Reino, e mester bay na un manera husto”.

Esaki segun Thijsen, kende a sigui bisa cu e problema di Aruba no ta solamente un problema financiero, sino uno constitucional tambe.

“Corsow cu St. Maarten a yega na un acuerdo, unda cu nan debenan a wordo paga y nan a laga Hulanda supervisa nan”.

“Esey tabata un acuerdo mutuo, pero pa Aruba esaki ta full otro”.

“Aruba tabata e pais autonomo sin problema financiero y nos tabata bayendo asina bon, cu nos tabata un ehempel den Caribe”, segun e parlamentario di MEP, kende a indica cu ta na 2009 e problemanan a sinta y esaki a sigui te cu 2017.

“Na 2014 nos a haya un supervision di Hulanda, no pasobra nos a yega na un acuerdo, sino pasobra Hulanda a dicidi di actua, door di fayonan den maneho di e Gobierno di AVP, cu ta inclui mal gobernacion y mal maneho financiero”.

Thijsen a sigui bisa cu ta na e momento ey Hulanda a bin cu CAFT, cu a bay atravez di un ley di Aruba.

“Door di esaki nos a bin haya sa cierto berdadnan riba con e Gobierno di AVP tabata hiba e finanzas, unda cu e tabata hinca nos den problema grandi”.

Esaki segun Thijsen kende a indica cu apesar cu e Gobierno tabata wordo supervisa durante 2 aña largo, e cos a bira peor.

“No bin bisa awor cu bo no sa di nada, pasobra bo a laga e cosnan pasa”, segun Thijsen, papiando di e manera di opera di CAFT.

El a indica cu CAFT mester a wak si e gobierno tabata hibando un maneho sano manera mester ta.

“Esey ta e fout cu nan a hasi y locual nan no kier bisa, pasobra na Aruba nos tabata tin un gobierno cu no solamente a hinca nos den problema door di mal maneho financiero, pero mas ainda tabata tin actonan coruptivo cu a tuma lugar”.

“Si bo sa cu un gobierno mester tene su mes na constitucion, na reglanan y na principionan di bon gobernacion, con bo ta lage keda sin entrega e presupuesto di 2018?”.

Esaki segun Thijsen, kende a splica cu e presupuesto mester a wordo entrega 1 di September y CAFT mester a bisa gobierno esaki, como asina yama ‘toezicht houder’.

El a indica tambe cu e gobierno nobo ta bay bin cu un bon plan economico pa haya ingreso, pa drecha finanzas y hinca placa den enseñanza, den husticia y den salubridad publico etc.

“No solamente nos ta bay drecha e asuntonan social, economico y financiero, sino nos ta bay drecha tambe e asunto cu nos estado di derecho no ta funciona”, segun Thijsen.

- Advertisement -

DUNA COMENTARIO

Please enter your comment!
Please enter your name here