Home Politica Arthur Dowers no ta descarta e posibilidad di acerca MEP pa mira...

Arthur Dowers no ta descarta e posibilidad di acerca MEP pa mira si nan por forma gobierno

248
1
SHARE
- Advertisement -

No obstante algun critica riba lider di MEP:

ORANJESTAD (AAN) – Minister Demisionario di Husticia mr. Arthur Dowers, a yama un conferencia di prensa, den cual el a elabora tocante informacion y formacion di gobierno.

E mandatario a subraya cu tin algun speculacion cu ta andando y e ta sinti cu como AVP y como gobierno mester trece padilanti.

AVP, manera ta conoci a sali e partido mas grandi, y den e dianan aki nan a wordo invita pa Informador, den e pasonan pa forma un gobierno nobo.

For di momento di eleccion por a tuma nota cu sra. Evelyn Wever-Croes a bisa cu e kier drenta gobierno y hasta den un termino prome cu ley ta stipula.

El a bisa cu gobierno di AVP mester bay mas lihe posible, y pesey el a braza sr. Otmar Oduber pa forma un gobierno, pero despues por a nota cu e ta manera retracta bisa cu nan no tin pura, y cu mester studia cierto aspectonan, y awor por a compronde atrobe cu nan tin pura y kier forma gobierno mas lihe posible.

Ademas, segun Dowers, sra. Wever-Croes a bisa cu cierto carteranan ta keda pe, y awor e ta bisa cu e ta dispuesto pa entrega nan.

“Un sistema di flip flop ta loke nos ta mirando den e formacion di e gobierno aki. En todo caso, como e partido di mas grandi den e eleccion aki y esun cu pueblo a duna mas confianza, nos ta sinti cu ta nos responsabilidad pa papia cu informador y dune nos punto di bista, con nos ta mira e proceso aki”, Dowers a subraya.

Dowers a subraya ta, cu loke nan a bisa Informador ta, cu como e partido mas grandinan ta dispuesto pa combersa cu e partido mas grandi di oposicion, na e momentonan aki, pa mira si ta posible pa nan presenta un programa cu AVP ta mira aceptable, cu nan por coopera cune pa wak si por forma un gobierno cu ta stabil, y mas cu tur cos, un gobierno confiable!

Dowers a remarca cu AVP a bisa hopi cla cu nan no ta dispuesto pa traha cu un partido chikito, y nan por a scucha sr. De Ruiter conta con e partido ey a wordo lanta y pa cual motibo.

“Nos ta sinti cu e partido aki ta carece di integridad di tal forma cu nos, bao di ningun condicion, lo kier forma parti di un coalicion cu un partido chikito asina aki”, Dowers a subraya.

E dignatario a agrega cu ta hopi importante pa mustra riba algun punto cu den e dianan aki a bin padilanti, na momento cu e bay bin na Gobernador y Informador a tuma lugar.

El a subraya cu sra. Wever-Croes a priminti masha hopi durante campaña na e pueblo aki. El a cuestiona cu e lider di MEP a sali cu algun documento braza den su man, despues cu a bisa cu e no sa con nos  pais su finanzanan publico ta, cu ta mustra sea cu e  no ta papia berdad of cu e no a haci su trabao.

Segun Dowers, e situacion financiero awe ta hopi mas cla cu na cualkier otro momento den pasado. Momento cu AVP a drenta den gobierno 8 aña pasa nan a haya un situacion berdaderamente caotico, segun e mandatario.

Nan ta corda riba un presupuesto supletorio cu a wordo pasa prome cu MEP a baha for di gobierno, den cual tabata tin un extra buraco riba e begroting di añanan cu a pasa, e tempo ey di 150 miyon florin. “Mi ta papiando no di un presupuesto di futuro, pero un presupuesto cu nan a laga atras. Ta hopi importante pa realiza cu na momento di bay un campaña. Y den e caso aki mi tin cu keda corda di sr. Nelson Oduber, ken den e dianan aki a duna diferente presentacion basta humoristico, unda el a papia hasta di un dori cu un scorpion. Mi kier sa cu MEP a bira un dori anto tin un scorpion cu dos rabo cu veneno riba e dori aki”.

Dowers a recorda e palabranan di Nel Oduber tempo cu el a bisa cu “campaña ta un cos y gobernacion ta otro cos”.

- Advertisement -

1 COMMENT

  1. awo cu boso a comete un blunder awo boso kier core wak si por acerca partido MEP pa forma un gobierno?? ban ta serio si MIKE
    ni na 2012 ora cu nan a sera VALERO gobierno no a para garantia pa nos corda awor cu tur e deficit finaciero cu aruba tin

DUNA COMENTARIO

Please enter your comment!
Please enter your name here