ORANJESTAD (AAN): Despues di un espera largo, cu un gran demanda di viaheronan, e compania Aruba Airlines ta anunciando regreso di su vuelonan Aruba-Curacao-Aruba cuminsando entrante 23 Oktober 2017.
DIARIO a compronde cu nan lo ta operando 2 vuelo diario cu excepcion di Diamars y Diahuebs cu lo tin vuelo nan adicional den ora nan di merdia tambe.
Aruba Airlines lo ta operando cu un Avion tipo Q300 (DH8-300) completamente nobo y moderno cu asiento nan di cuero y e body parti pafo lo ta full na color nan di Aruba Airlines mescos cu e Airbus A-320.
E avion Dash 8 aki tin un capacidad di 50 asiento completamente clase economico unda bo lo sinti bo mes sinta comodamente manera un pasahero den busyness class.
DIARIO a haya sa cu ya caba nan ta aceptando reservacion, y por contact e aerolinea na telefon of pasa personalmente na Cumana 69 (ex codemsa building ) como tambe na e oficina na aeropuerto.
Aruba Airlines ta gradici e comunidad pa haci uso di nos vuelo nan y awo tambe cu e destinacion nobo di Corsow y proximamente e isla di flamingo Bonaire.
