Home Cumpleaños Asina a celebra e di 98 cumpleaño di Joe Dania

Asina a celebra e di 98 cumpleaño di Joe Dania

173
0
SHARE
- Advertisement -

ORANJESTAD (AAN): Riba un dia manera diahuebs, 5 di october, pero na aña 1919, pues 98 aña pasa, Jose Maria Dania a nace.  Awendia tur hende conoce den Dakota como “Joe” of “Papai”, y ta biba na Shimarucustraat 4.

E tin 6 yiu, di cual 3 hende homber y 3 hende muhe, un cantidad di niet y bisa nietonan. Awe mas o menos 30 hende di su famia a uni na su cas y a sali dal un keiro den bus pa asina celebra su hacimento di aña.

Joe Dania a pasa un rato masha ameno y agradabel cu henter su famia, pasando lugarnan icono di nos isla, manera ta Natural Bridge, Kapel di Alto Vista y varios otro atraccionnan mas. Famia mes a percura pa tur cos di come y bebe durante e trip den bus. Anochi lo bay misa na Dakota pa pidi bendicion di nos bon Dios, pa e por ta pa hopi aña mas hunto cu nos.

Con ta cu su salud? “E ta miho cu mi”, asina su yiu homber, e conocido Tumbero, Ito Dania, a contesta riba nos pregunta. El a conta cu su tata ta masha activo, ta traha tur dia den cura, ta gusta traha obranan di mas y nunca ta sinta keto. E ta considera su tata un berdadero ehempel pe, pasobra nunca el a mira e tata huma un sigaria ni bebe alcohol.

Joe Dania tin un solo ruman na bida na Aruba, su ruman muhe, cu tambe a compañ’e durante su celebracion. Su otro rumannan ta biba na Corsou.

Su carera mes a cuminsa trahando pa Dundun Ecury den centro di ciudad ora e tabata jong. Despues el a bay sirbi dienst, e ta un di e schutternan mas bieu na bida. E ta un di e poco hendenan cu por bisa awe ainda di a mira dos guera mundial, un como mucha y otro como soldat. E aña aki ainda el a ricibi reconocimento di Cuerpo Militar di Savaneta. Despues di a sirbi su pais, Joe Dania a traha a hopi aña na WEB, te cu el a baha cu pensioen.

Ora a puntra Joe Dania, kico ta su secreto pa por biba asina largo, anto den bon estado di salud, tanto fisico como mental, el a contesta: “Mi secreto ta pa djis wak padilanti, no wak patras. Cana pa bo yega, no keda para wak patras”.

- Advertisement -

DUNA COMENTARIO

Please enter your comment!
Please enter your name here