Home Politica AVP ta mira hopi cla cu coalicion MEP-POR lo pone medida riba...

AVP ta mira hopi cla cu coalicion MEP-POR lo pone medida riba lomba di pueblo

246
0
SHARE
- Advertisement -

ORANJESTAD (AAN) – Minister Mike de Meza, den conferencia di prensa reciente, a expresa cu nos mester di un stabilidad sumamente grandi pa gobernacion di Aruba, pero esaki no ta bay ta sostenible (MEP-POR), y esey ta bay hiba nos pais hopi aña atras tambe y na momentonan sumamente importante.

Esaki pasobra AVP den gobierno a traha riba crecemento di economia y stabilidad financiero. De Mesa a subraya cu e ta corda tempo cu nan a asumi mando na 2009, mesora nan a wordo presenta cu un presupuesto supletorio, cu mester a bay parlamento cune, y cu tabata riba 350 miyon florin adicional cu a wordo gasta.

El a corda tambe cu gobierno a ricibi e presupuesto di 2010 den concepto, manera gobierno di MEP a laga atras cu un deficit riba dje di mas cu mey biyon florin, pues riba 500 mil florin.

E ta corda tambe cu MEP su conseho e momento ey tabata pa aumenta BBO di 3% pa 6% of mas.

E mandatario a subraya cu por escrito, nan lo trece e documentonan aki y cu esaki ta e tipo di gobernacion cu AVP ta premira.

“Mi ta contento di scucha cu MEP y POR a laga sa cu nan no ta bay tuma medida. Mi ta spera cu nan wanta na esey tambe, pasobra lo ta hopi interesante pa mira pa di ki forma e dos partidonan aki ta bay goberna”, De Meza a expresa.

Tocante e asunto cu tin buraco den e presupuesto y cu nan ta bay haci un investigacion, opdracht di Informador ta pa bay busca un institucion internacional pa haci un estudio. “Nos ta haya cu e ta completamente innecesario. Ora nos a drenta gobierno no tabata tin jaarrekening.

Mi ta corda cu na 2012 nos mester a bay bek te na 1986 te 2011 y nos a traha jaarrekening pa tur e añanan ey, y awe nos ta sumamente orguyoso di por bisa cu pa tur aña tin cuenta anual y esakinan tin cu wordo trata den Parlamento”, de Meza a señala. El a indica tambe cu ya hasta e cuenta anual di 2016 ta traha caba pa bay Parlamento.

“Tin informacion, tin informe di cuartal, tur na un manera hopi comprendible y detaya.CFT ta duna su rapport , e ta scucha gobierno, ta sinta cu Parlamento, y tur informacionnan aki ta wordo publica” minister De Meza a señala.

El a agrega cu tin e rapportnan di Standard & Poors, tur aña, di Fitch y IMF tur aña, tambe nos Banco Central cu ta saca nan informe continuamente, y ademas e institutonan di gobierno cu tambe ta emiti nan rapportnan, entre otro SVb, APFA, y AZV. Tur e rapportnan aki tin, y ta innecesario pa bay busca hendenan di afo cu no conoce e sistemanan di Aruba, pa bin traha un rapport cu no ta bay bisa nada mas, y nada diferente, di loke tur e informenan aki ta bisa.

“Nan ta busca hustificacion pa bin cu hendenan di afo y bisa pueblo wak kico e hendenan aki ta bisa, cu nos tin cu tuma medidanan pa pueblo. Y esey ta bay ta inaceptable, sigur, pa partido AVP den oposicion. Di akinan mi kier alerta e gobierno instabil ey cu no ta sostenible pero cu, aparentemente, ta bay wordo forma cu nos no ta bay acepta e tipo di trikinan ey”, de Meza a remarca.

E dignatario a reitera cu e cuentanan anual ta up to date, e presupuesto 2017 ta den efecto, e deficit ta na 0.5%, gobierno a cumpli cu e puntonan cu CFT a pone riba papel, y e ta spera cu e gobierno den concepto, cu ta formando aworaki, lo por sigui logra esaki; pero conociendo e partidonan cu lo ta formando gobierno aworaki, nan lo pone medida riba lomba di pueblo cu lo bira inaceptable, y cu for di awor e por bisa hopi cla.

- Advertisement -

DUNA COMENTARIO

Please enter your comment!
Please enter your name here