ORANJESTAD (AAN): E desaroyonan rond di monedanan virtual (manera bitcoin, litecoin, etc.) ta bayendo rapido y ta creciendo den popularidad.
Actualmente e monedanan aki no ta cai bou alcance di e leynan sectoral di supervision di Aruba. Consecuentemente, Banco Central di Aruba (BCA) no ta supervisa monedanan virtual ni companianan/instancianan cu ta hasi negoshi den monedanan virtual.
BCA ta conseha consumidornan pa ta conciente di esaki, y tambe cu nan mester ta conciente di e riesgonan potencial di cumpra bitcoins of otro monedanan virtual of digital.
E tasanan di cambio di e tipo di monedanan aki, por ehempel contra e dollar mericano, por ta extremadamente volatil, y no tin un institucion central cu ta emiti e tipo di monedanan aki cual consumidornan por tene responsabel si tin e necesidad pa haci esaki, Banco Central di Aruba ta remarca.
