ORANJESTAD (AAN): Un beyeza hoben local, ta preparando pa durante luna di November, participa den certamen di Miss Teen International H2O Ambassador 2017, cu lo tuma lugar dia 11 di November venidero na Curaçao.
Celine ta viahando dia 7 November pa Curacao hunto cu su mama y e conocido Endy Croes, kende ta esun cu ta bay prepare na e isla ruman.
Di Aruba mes, un grupo di como 10 persona ta bay dune apoyo y sosten.
Robin Croes-Ponson, kende ta president di Miss Youth Aruba, y nan organizacion MTA Foundation ta orguyoso cu un di e finalistanan di Miss Youth Aruba 2017 ya caba ta haya chens di representa e isla den exterior.
Ademas di Celine Shipley, nan ta bayendo cu einanan Mrs United Nations 2017 Diana Bikker, y tambe Pre Teen Aruba 2017 Ginayla Hernandez. E fanaticonan mes ta viahando dia 9 di November venidero.
E certamen na Curacao, lo conta cu participacion di beyezanan di e.o. Canada, Curaçao, Venezuela, Colombia, Hulanda, Panama, etc.
E organizacion local kier a gradici Aruba Tourism Authority, Line of Style cu lo bisti Celine durante su siman, Endy Croes, Carlos Tromp y Budum pa su costume, Seccion Arubiana (Biblioteca Nacional) pa informacion referente su proyecto di “Awa”.
E lo bay ta un siman extenso pa Celine, y e pre-final mes ta Diahuebs 9 di November. E certamen final mes lo ta Diasabra dia 11 di November.
