Home Deporte Deportivo Nacional a bay cu victoria riba Riverplate

Deportivo Nacional a bay cu victoria riba Riverplate

51
0
SHARE
- Advertisement -

ORANJESTAD (AAN): Diasabra anochi e di dos wega di e campeonato 2017-2018 di futbol di division honor a continua unda cu e Riverplate a topa e campeon di e campeonato anterior Deportivo Nacional. Deportivo Nacional a sa di domina e wega y na final a bay cu e victoria di 5-1.

Desde trempan Deportivo Nacional a bay den atake unda cu na 7 minuut di wega C.A. Carabali de la Cruz ta habri e marcado. Wega ta continua unda cu Riverplate a haya posicion di e bala y Theo Teixeira a deposita esaki den e net na 17 minuut wega. Riverplate a busca pa pasa e defensa di Deportivo Nacional, pero no tabata logra haya e buraco manera nan tabata desea. Na 28 minuut di wega Bryan Bedoya a anota e di 2 gol pa Deportivo Nacional. Faltando un par di minuut p’e prome tempo termina, Kenroy Ranger a anota e di 3 gol pa Deportivo Nacional.

E di dos tempo a inicia cu un Deportivo Nacional dicidido pa mantene e bentaha, mientras cu Riverplate tabata busca pa corta bentaha di gol. Na di 48 minuut di wega un biaha mas Kenroy Ranger a haya chens pa anota e di 4 gol di e anochi aki. E hungadonan di Riverplate nan rendimento a cuminsa cay y aki ta unda cu Deportivo Nacional a probecha y Edward Clarissa a anota e di 5 gol na 77 minuut. E wega a continua unda cu Riverplate a purba wanta e team di Noord te den 90 minuut.

Director tecnico di Deportivo Nacional, Dreyer Bracho, a indica cu desde trempan nan por a domina e wega, unda cu tur hungado tabata pendiente di kico nan mester a haci durante e wega. Tabata importante pa Deportivo Nacional di a domina e wega desde trempan aunke Riverplate a empata e wega. E 5 golnan aki a duna e hungadonan mas confianza p’e siguiente wega y asina mes nan sa cu no mester celebra hopi, pasobra apenas e campeonato a cuminsa y tin teamnan cu un plantamento mas miho. Nan siguiente wega lo ta diasabra 21 di October contra Dakota y Deportivo Nacional lo prepara nan mes na e mesun manera. P’e wega aki nan ta invita e fanaticonan pa yega stadion y apoya nan.

Director Tecnico di Riverplate, Alejandro Avila a expresa cu a enfrenta e ultimo campeon di e campeonato cu ta un bon team y tabata bon forma cu un gran cantidad di hungado. E ta haya cu Riverplate tabatin un encuentro dificil, pasobra na comienso nan por a controla e bala, unda cu a empata e wega pero despues a bin tiro di pinalti y esaki a costa Riverplate pa bin back den e di dos tempo. E team mes a cay hopi durante e rendimento y esey a duna e resultado aki.

Pa loke ta e di dos wega e preparacionnan lo sigui manera e ta bayendo, pero e coach ta kere cu e diferencia e biaha aki ta cu nan lo tin 7 hungado clave. El a splica cu 4 hungado estelar tabata suspendi pa motibo di carchinan di e campeonato anterior y tabatin hungadonan den exterior pa cuestionnan di trabao. Riverplate ta kere cu teniendo back e hungadonan estelar p’e siguiente wega e rendimento lo ta miho. Riverplate su di dos wega lo ta contra Bubali diabierna awo y ta invita fanaticonan pa yega stadion y apoya e team.

- Advertisement -

DUNA COMENTARIO

Please enter your comment!
Please enter your name here