ORANJESTAD (AAN): Biblioteca Nacional Aruba ta contento di por a forma un grupo di escritor di buki pa mucha, ilustrador y contador di storia cu hunto ta duna e di 25 edicion di Festival di buki pa mucha su forsa y diversidad. Biblioteca ta yama bon bini na Gabriel Mercera (Tio Gabi) y Kathleen Thielman for di nos hermana isla Boneiro.
(Tio Gabi) Gabriel Mercera ta un musico y poeta y ta gusta trece su mensahe pa medio di musica. Y Tio Gabi ta gusta rima. TioGabi ta gusta haci hende contento pa medio di musica y ta usa esaki pa yega na mucha y hende grandi. E ta toca diferente instrumento den su lesnan acompaña cu poesia ritmico y ta uza e medio aki specialmente pa yega na mucha cu mester guia.
Kathleen Thielman-Winklaar ta un juffrouw di school pa 16 aña caba na Boneiro. E tin grupo 2 cu tin 30 mucha den klas. Y e tin su programa pa mucha na radio. E ta gusta conta storia na fiestanan di mucha. Juffrouw Kathleen ta bay conta storia for di su prome buki ‘Ban e fiesta grandi cu nos’. E ta spera cu tur mucha di Aruba ta haya oportunidad pa lesa e buki aki.
Otro storia cu e ta bay conta e muchanan di Aruba ta ‘Boli y sapu tin miedu’. Kathleen Thielman a pone tur su pasion pa skirbi storia pa mucha den e produccion aki.
Ya pa 25 aña biblioteca ta trece mucha hunto pa scucha storia, stimula lesamento y conoce autor y ilustrador pa medio di un festival grandi. Apertura di e festival ta diabierna dia 3 di november. Muchanan di Sint Paulusschool y diferente otro grupo ta duna un bunita presentacion riba stage pa yama tur autor y ilustrador bon bini. Den siman di 6 pa 10 di november lo tin bishita di school y merdia tin actividad na biblioteca. Tur mucha ta bon bini y presentacionnan ta gratis.
