Home Policial Dos curpa di hende homber haya ta drief den area di Baby...

Dos curpa di hende homber haya ta drief den area di Baby Beach

743
0
SHARE
- Advertisement -

Posiblemente dos persona cu kier a drenta e isla ilegal

ORANJESTAD (AAN): E yamadanan cu a cuminza drenta, ya caba a pone Polis bay den alerta.  Un situacion cu a pone diferente unidad di Polis, como tambe personal di Guardacosta acudi na e punta mas pariba di Aruba.

Tur cos a cuminza, debi cu biento fuerte y lama basta bruto a pone cu Diamars mainta un curpa sin bida cu tabata drief a spula yega den e boca di Baby Beach.

Ta un docente di Scol kende tabata duna zwemles na e lugar a bati alarma.  El a splica cu dos turista a yega cerca di dje, y nan a bise cu nan a mira un curpa ta drief banda di ex-Nanki (Esso Club).  El a confirma esey, y a raporta na autoridad pa 10:35 am.

Pero debi cu e coriente di lama ta asina fuerte e curpa a bay abao y nan a perde for di bista.

Polis a cuminza haci un buskeda, tanto riba tera, na oriya di lama, y boto di Guardacosta cu Maritiem Politie abordo. Pero e olanan bruto no tabata coopera.  Cuerpo di Bombero tambe a presenta pa duna un man.

Cu ayudo di helicopter di Guardacosta, pa 1:00 pm a haya bista riba e curpa.

Pro banda di 1:10 pm, un otro informe a drenta for di Guardacosta cu nan ta mirando un otro curpa ta drief banda di e rif na Rodgers Beach.

Na e momento ey, tabatin personal di Marina Hulandes ta entrenando, y aki nan a bin duna un man pa saca e curpa y pone riba rif.  Guardacosta a yega na e rif y hisa e curpa sin bida abordo di boto, y trece na e Pier banda di ex-Nanki.

Riba curpa di un di e hombernan a haya identifacion cu ta indica cu e ta A.R.C. di nacionalidad Venezolano, naci na aña 1965, pues tin 52 aña di edad.

Pa 2:45 pm, Dr. Texiere a constata morto di e homber aki.

Un rato despues, pa 2:50 pm, Dr. Texeire a constata morto di e otro homber, riba cual no a haya identificacion riba dje.

Fiscal como tambe Recherche tabata na altura.  Na final. Ministerio Publico a tuma e curpanan den beslag, y asina a start un investigacion.

Personal di BFTO tambe, hunto cu personal di Slachtofferhulp a presenta na e lugar di e sucedido.

Ken e personanan aki ta?  Nan lo a purba di drenta Aruba ilegalmente via lama, y a keda asombra pa e lama bruto?  Of kizas nan ta abordo di cualkier lancha cu a trece nan tera, y kizas a bolter?  E investigacion tin di bay determina esey, ora cu autoridad logra haya mas detaye di e victimanan, kizas for di Venezuela.

Fuera di esey, un suplica ta bay na tur persona cu e dianan aki ta bay lama, pa tira bista si cualkier obheto, tas, of cartera lo por spula riba beach, pa asina notifica Polis mesora.

Na famia di e fayecidonan, ta bay palabranan di condolencia.

 

- Advertisement -

DUNA COMENTARIO

Please enter your comment!
Please enter your name here