Dos sospechoso deteni cu Cocaina, Ecstasy, Molly, y Marihuana

ORANJESTAD,(AAN);—  Diadomingo marduga pa alrededor di 2:50 am, patruya di polis Oranjestad e momento ey tabata riba parkinglot di  “Heart Music Aruba Café” cerca di Pos Abao.

Riba e parkinglot polisnan a wak un Honda Fit shinishi cu plachi di number A-54645  y ademas polisnan a wak un homber para pafor di e vehiculo na banda di porta di pasahero.

E homber en cuestion ora el a wak auto di patruya a bin den su direccion y el a cuminsa move cu pasonan rapido ta cana bay pazuid. Polisnan a baha mesora for di auto di patruya  y a acerca e homber. Yegando cerca di e homber polisnan a wak cu den su man robez e tin e saco di plastic.

Polis a atende homber y e homber a keda para un rato y a bira y a cana bay direccion di e Honda Fit. Yegando na e vehiculo Polis a mira claramente con el a tira locual e tin teni den su man robez den e auto via bentana banda robez riba e asiento di pasahero patras.

Cu un flashlight polis a lusa  riba e asiento patras di e auto y a wak e saco di plastic cu ta contene pildoranan berde .

Y aki e sospecho a lanta cerca e polisnan cu probablemente e saco di plastic ta contene pildora Ecstasy.

Relaciona cu esaki polis a pidi e chofer di e auto Honda Fit shinishi A-54645 pa baha for di e vehiculo . Ora cu e chofer a baha, polis a wak e saco di plastic transparente cu tabata contene cierto cantidad di substancia parecido na marihuana den un espacio riba e Car-Stereo di e auto.

Relaciona cu locual polisnan a constata a dicidi pa listra e personanan aki na paña.

Polis a wak enberdad un saco di plastic cu e homber a tira zwaai den e auto cu a cay riba asiento patras cu ta consisti di tres pildora Ecstasy, un saco di plastic transparente cu cierto cantidad di marihuana, cierto cantidad di cocaina tambe a wordo confisca.

Ademas siete zip-lock transparente cu ta contene substancia rose parecido na MDMA (Molly) y algun LSD.

Relaciona cu tur e droga prohibi aki, Polis a detene e homber R.D. Campo naci na Venezuela dia 4 juni 1982 e ta hospeda pa na un direccion desconoci.

Tambe a detene e chofer A.J. Werleman naci na Aruba 10 di Mei 1984 biba na Santa Cruz.

Ambos detenido a wordo transporta cu vehiculo special pa warda San Nicolas. A presenta nan dilanti fiscal auxiliar y ambos a keda encarcela pa mas investigacion.