Home Remitido Droga (Marihuana) ta mata bo. Punto!

Droga (Marihuana) ta mata bo. Punto!

76
0
SHARE
- Advertisement -

Comentario:

Pa: Pedro (Shon P. Krozendijk)

Señor redactor, permiti mi duna mi opinion basa riba mi experiencia policial di 28 aña den Cuerpo Policial.

Laga mi pone bon cla dilanti cu e añanan menciona y principalmente durante e añanan cu mi a traha e tempo ey na Kinder-en-Zeden Politie combina cu Recherche y diferente biaha mi a yuda cu razia y, of “inval” den casnan sospechoso y aresta sea dealernan/usadornan, mi no por corda cu usadornan cu a bisa cu nan a cuminza droga prome cu cocaine, heroina, L.S.D, etc. No, querido lectornan, nan tur a cuminza cu Marihuana.

Mi a yega di bay cursonan/lecturanan di BNND (Bureau Narcotics and Dangerous Drugs) cu despues a bira DEA (Drugs Enforcement Administration). E expertonan aki y den nan tabata tin docternan cu tabata pone enfasis riba e hecho cu droga ta mata bo. Punto. Keda leu for di e maldito droga ey.

Si nos mira bon rond di nos, wak cuanto hende ta droga. Tin ora nan no sa mas cu nan ta na bida. Mi ta kere cu esaki tambe e expertonan menciona ey, kiermen. Pues, cu droga ta mata bo. Ki valor un hende asina tin?

Mi ta kere cu un hende no mester ni purba e marihuana pa curiosidad, pasobra e chens ta grandi cu lo bo sigui use. Hobennan si boso ta stima boso curpa, por fabor keda lew for di droga, specialmente marihuana pasobra esaki ta comienzo.

Mi tin un proposicion pa esnan cu ta us’e y propagand’e sea pa legaliz’e o sea pa nan sigui dal’e y bay biba na Bushiribana, nan so anto leu for di un comunidad cu ta respeta su mes.

Mi ta spera cu nan tene cuenta cu ora pitufo dal nan pa nan no dal un duik na Boca Mahos cu ta ey banda mes. Nos comunidad tin basta problema caba sin uso di marihuana. Dios spaar nos.

Den mi careda policial mi a yega di topa cu hopi hoben cu tabata haci cosnan straño, despues a resulta cu nan tabata bao influencia di droga (Marihuana). Un di nan tabata un hoben cu a staca un carne cu cuchio di e pata pasa door di e carne su barica pa despues e cuchio keda stanca, pega, claba den tera. Mi a compronde cu ta un di su mayornan el a busca pa mata, pero no a haya nan, of un di nan.

Que hubo di e caso tristo cu a pasa na aña 1966 caminda un hoben a mata su tanta cu dos yiu y herida e casa, casi mortalmente? E tempo ey caba Marihuana a haci su entrada na Aruba. No por sigui bay den historia y mira cuanto daño a wordo haci door di e maldito droga ey. Awendia habri corant y lesa kico ta pasando rond. Ami ta convenci cu hendenan na tino no ta haci tur e bagamunderianan cu ta sosodiendo riba nos pida baranca stima cu yama Aruba.

Nos tur, incluyendo esnan cu ta pro legalizacion di Marihuana, pa corda un rato cuanto dolor droga a causa y ta causando den mayoria di nos casnan di famia aki na Aruba.

Ta berdad cu na Hulanda bo por uza 5 gram of ta 15 gram pa uso personal. Pero awor Hulanda mes kier hala e holoshi patras, pasobra ta hopi problema esaki a causa principalmente di Union Europeo caminda cu fronteranan a wordo habri y den e Koffie Shopnan bo ta haya droga cumpra. No lubida ora bo habri frontera ta tur sorto di hende ta drenta bo pais. Na Hulanda esaki a bay for di man. Ta e hendenan aki ta comete atraco, traficacion di hende y secuestro, etc. Nan ta wordo uza door di malhechor intelectual. Ban sigui bisa no na marihuana.

 

 

 

 

 

- Advertisement -

DUNA COMENTARIO

Please enter your comment!
Please enter your name here