Home Parlamento Drs. Marisol Lopez Tromp tambe a expresa su discurso di despedida di...

Drs. Marisol Lopez Tromp tambe a expresa su discurso di despedida di Parlamento saliente

137
0
SHARE
- Advertisement -

ORANJESTAD (AAN) – Parlamentario drs. Marisol Lopez-Tromp tambe a tuma despedida como miembro di Staten, durante e ceremonia di presentacion y aprobacion di credencialnan, di e constelacion nobo di Parlamento.

El a desea tur e parlamentarionan nobo hopi pabien, sano huicio, hopi sabiduria y pasenshi, muy en particular na e famianan di e miembronan nobo di Staten, y specialmente hopi comprension pa e mundo politico, e mundo publico, y e mundo di sacrificio unda no ta wordo distingui cu 24 ora pa dia bo ta miembro di Parlamento.

“Keda mantene e curazon habri pa pueblo y prepara e cuero tambe pa bira mas duro ainda di loke ta kizas caba, pa loke e ta di anda cu e bida publico mas ainda di loke bo por tabata tin caba”, drs. Lopez-Tromp a subraya.

Y na esnan cu a dispidi di Parlamento, como colega of ex-colega (con cu nan kier mire), Lopez-Tromp a desea nan hopi exito den futuro y a gradici cada un tur nan aportenan cu nan por a duna durante e transcurso di e añanan cu a pasa, por ehemplo den cambionan di ley cu ta na beneficio di Aruba.

E dama a referi tambe na e Presidente di Parlamento saliente y a gradicie su trabao y a desea exito na e Presidente nobo di Staten cu lo mester a wordo nombra.

Como ex-presidente di Parlamento, funcion cu drs. Lopez-Tromp a asumi pa tres aña largo, el a duna su mensahe riba e cargo aki, cu ta sumamente importante pa Parlamento di Aruba como Instituto.

El a expresa cu e ta spera cu e Presidente di Parlamento nobo, lo sigui cu e trabao pa independiza Aruba su Staten, pasobra e ta bon pa nos democracia y pa loke ta e autonomia di nos Parlamento. Ademas pa traha riba e ley di Ombudsman y Kinder Ombudsman.

Drs. Lopez-Tromp a menciona esaki pasobra ta den man di e Presidente di Parlamento, pa dirigi e comision y yama e reunionnan aki.

Tambe e ta spera cu e lo sigui cu e trabao di reforza e personal di Parlamento. Y e ta spera di e parlamentarionan nobo pa pone hopi enfasis y sigui traha riba e relacionnan den Reino Hulandes, e relacionnan inter-parlamentario.

Lopez- Tromp a señala cu hopi biaha pueblo pafo ta mire como su fuera Parlamentario ta bay biaha, pero nan no sa tur e embergadura cu e trabao aki tin pa yega na cooperacionnan den Reino, riba un nivel  cu ainda tin basta pa wordo haci. Un acuerdo importante cu el a referi na dje ta e Geschillen Regeling, aunque e no a wordo honra of respeta manera cu nos Parlamento lo a desea.

Otro aspecto cu e ta desea pa e Presidente di Parlamento nobo pone mas enfasis riba e rol autonomo di Raad van Advies y Rekenkamer, cualnan ta institutonan hopi importante banda di Parlamento.

Drs. Lopez-Tromp a gradici tambe tur e personal di Staten, e Griffiernan, prensa, cushina, administracion, seguridad, etc., pasobra pueblo ta wak esnan den Parlamento, pero no ta mira esnan nan tras cu diariamente tey pa haci nan trabao incansablemente independiente di ki constelacion tin eyden.

El a expresa cu tur parlamentario por forma parti di un partido politico pero un bez cu nan ta pone pia den Parlamento, nan ta sirbi Aruba na prome lugar, pero no esey so, nan ta traha cu coleganan parlamentario cu alavez por ta contrincantenan politico. Pues ta un constelacion hopi particular cu Presidente di Parlamento y Griffier tin cu deal diariamente cune na bienestar di Parlamento. Otro punto cu el a menciona ta e protocol cu tur miembro di POR, di cual e ta forma parti di dje, a firma y a cumpli cune y cu ta un iniciativa di sr. Oduber, e ta spera cu e lo bira un ley tambe pasobra e eleccion cu nan ta bay ta pa elegi representante di pueblo den Parlamento, y di eynan ta saca a gobernantenan, y e ta honra e democracia di nos pais, pasobra esnan cu tin mas voto ta drenta e cas di pueblo.

Drs. Lopez-Tromp a subraya si, cu un desventaha cu semper tin como Presidente di Parlamento, ta cu e no por debati den Parlamento manera e ta desea. Hopi biaha otronan kier sa su opinion, pero e tin cu hunga un rol basta neutral y esey ta nifica manera e tin un bozal. E no por haci esaki pero e ta dirigi e reunionnan di Parlamento. Finalmente el a remarca cu e ta spera cu e parlamentarionan di e constelacion nobo tanto esnan cu pa prome bez ta drenta como esnan cu tey caba y ta sigui, expresa nan opinion di manera democratico, y tambe hacie ora ta vota pa un ley, pasobra pueblo no kier un stempel parliament y esey a wordo demostra.

- Advertisement -

DUNA COMENTARIO

Please enter your comment!
Please enter your name here