ORANJESTAD(AAN): Cada biaha e plachinan di number ta un dolor di cabes, esta e pagonan. Segun e directora di Impuesto, por mira un adelanto si, compara cu e añanan anterior. Ta hopi satisfecho cu esey.
Naturalmente e clientenan a cuminsa haya e ritmo, e disciplina pa por cumpli cu e terminonan di pago. Loke si tin cu menciona ta cu naturalmente semper tin cosnan cu por drecha den e eficiencia ora ta trata pago online, ora ta trata verwerking di e pagonan na e departamento. Pa 2018 nan lo por spera cu toch e ta cana, segun compas.
Pa e otro belastingnan, no tur ora ta e caso y ta menciona tambe cu pa loonbelasting, BBO, ta ripara cu toch e compliance no ta manera mester ta. Ora ta papia di compliance, ta nifica cu ta cumpli cu e debernan di impuesto. Ta mira cu hopi biaha cu saca aangifte, no tur ora e clientenan ta entrega e aangiftenan na ora of no ta haci e pagonan corespondiente.
Ta bezig ta wak e clientenan aki di cerca y lo saca cobransanan adicional, caminda cu e cliente cu no cumpli cu su pago, ta haya un cobransa. Esey ta conta tambe pa e impuesto di vehiculonan di motor. Pa 2017, a manda varios carta. Cartanan di notificacion, di no cumplimento y awo cu aña ta bay cera, ta bay mira e total un biaha mas y lo bay saca cobransanan adicional.
E meta ta pa e di dos pa di tres siman di November pa loke ta e stickernan di 2018. Ta spera cu por keda cla cu esaki pa por duna suficiente espacio durante luna di November, December y Januari, pasobra fin di Januari ta deadline pa e clientenan bin haci nan pago pa vehiculonan di motor.
Hopi hende tabata custuma cu den un temporada ya prome cu December, ta prepara nan pago pa nan por tin nan plachi di number nobo, prome cu aña bolter riba nan auto. E ta un orguyo di hopi hende pa hopi aña. Pa loke ta e sticker, Luenne Gomez-Pieters, ta splica cu ta compronde cu den su propio famia, semper e ta manera un pustamento ken ta core cu e nummerplaat nobo mas prome cu tur hende.
A mira tambe cu e kostenplaatje. Loke kier a yega na dje y ta bay yega na dje, ta un plachi di number cu ta duradero, cu por worde mira na otro paisnan ta e caso y cu tin hopi mas cos cu por worde añadi na dje, caminda cu otro departamentonan por haci uzo di dje. Por ehempel un barcode, chip, etc.
Si mira bon, pa aña ta saca mas cu 600 mil Florin na plachi di number. Tin cu administra esakinan. Tin cu warda esakinan. Naturalmente nan tin un balor. Mester tene cuenta cu e ta fraudegevoelig, pa bay haci negoshi cu plachi di number, pasobra tur esakinan tin un balor riba e prespuesto.
A dicidi conhuntamente cu minister, cu ora bay faseer uit e plachi di numbernan, cu lo bay uza e mesun plachi di number cu nan tabata uza, cu ta 2015 pa 2016, te ora cu ta cla cu e proyecto pa por tin un plachi di number duradero.
E controlesticker a reemplasa e plachi di number chikito, caminda cu esey tabata worde uza pa controla si belasting ta paga si of no. E sticker tambe ta mas visibel ora cu bo ta core cu auto, bo por wak den un frega di wowo, si un hende a paga full aña, mita aña pa control di polis, lo tabata mas facil.
A ripara un caida den entrada, pero 2017, ta basta satisfecho cu e response di e clientenan caminda cu a wak cu nan tin e disciplina di bin paga na tempo y cumpli cu e terminonan di ley. Paga belasting no ta algo cu ta conciente di dje, no ta algo cu ta bin paga cu hopi smaak, pero na final, un pais ta draai door di entradanan di belasting.
Si tur cumpli y finalmente e tarea di belastingdienst pa percura pa tur cliente cu lo mester paga ta beschreven den e sistema y si tur cumpli, nos tur ta paga menos na final di dia.
Si ta un grupo chikito so ta cumpli, e peso ta riba e grupo ey y esnan cu lo mester paga, no ta paga of no ta cumpli cu nan debernan fiscal. Esey ta e tarea di belastingdienst pa tur hende ta den nan sistema.
Esnan cu no cumpli, ta manda cartanan di notificacion, ta manda cobransanan adicional pa esnan cu no ta cumpli y si nan no cumpli cu e pagonan tambe, tin un proceso di invordering cu ta cuminsa cana.
E costo di sticker ta corte na mita di loke tabata paga na plachi di number y esey ta un besparing pa Gobierno riba e tereno aki. Ta purba di wak como departamento pa ta hopi mas eficiente, pa nan cobra loke tin cu cobra, pero tambe den gastonan, ta purba di wak caminda cu por spaar Gobierno placa den gasto, ta haci esaki. Naturalmente no ten koste di calidad.
Ta conciente di berdad di e plachinan di number caminda cu e verf ta blikia y ta bin cu un solucion pa e clientenan riba e tereno ey. Tin hopi cliente ta core cu plachinan di number blikia. Por ta tin cu manda yama nan si nan no bin di nan mes, pa asina nan bin cambia nan plachi di number.
E tin su funcion pa polis pa por identifica un auto si acaso den un accidente of cualkier otro eventualidad, e tin su funcion. Ta pensando tambe kico ta bay haci cu e clientenan cu no ta bin di nan mes, sino ta manda yama nan.
