Home Remitido E piscadornan tin razon pa keha?

E piscadornan tin razon pa keha?

20
0
SHARE
- Advertisement -

Remitido

Laga mi limita mi mes na 4 punto den e discusion.

(1) Nan ta bisa cu Santa Rosa (DLVV) no tabata envolvi den e discusion  encuanto e creaccion di e ley cu awor t’asina pisa den boca di e piscadornan. Esaki NO ta correcto; DLVV a ser envolvi. Ta question di busca e minutonan (notulen) di e reunionnan pa haya sa mas concreto kico a ser treci dilanti pa  DLVV.

Den un comunicado di prensa siman pasa Directie Natuur en Milieu (DNM) a trece varios vez dilanti cu realmente Santa Rosa a ser debidamente envolvi! Nan a mustra riba lo siguiente:

Na 2007 a institui un ‘Commissie Flora en Fauna’ cu a haya un concepto di lista di flora y fauna for di Santa Rosa.  E ‘Commissie Flora en Fauna’ a envolucra e dos autoridadnan riba e tratado di CITES, esta Departamento di Veterinario y Santa Rosa (e ultimo aki ta representa tambe den e directiva di Centro di Pesca di Hadicurari) pa sigui traha riba e lista aki.

A scucha e dos departamentonan menciona y a ricibi nan sugerencianan cu ta inclui den e lista.

DNM a haci un peticion na Santa Rosa y Servicio Veterinario  pa entrega nan motivacion pakico e sortonan indica mester ta riba e lista aki. Pa loke ta trata e piscanan, usando e criterianan traha, a keda di e 108 sortonan di pisca riba e lista original di e ‘Commissie Flora y Fauna’, solamente e famia di Gutu y e Nassau Grouper. Acerca a bin e Goliath Grouper y e Atlantic Bluefin Tuna.

DNM mester remarca cu Santa Rosa a haya e lista di flora y fauna na 2013 pa duna nan comentario. Riba e lista encuanto e.o. pisca, nan a duna ningun comentario.

Na final di nan comunicado DNM a trece un punto interesante dilanti. Nan ta bisa textualmente: “cu asombro por tuma nota cu Santa Rosa, awor cu e ley ta na vigor, ta bin cu e remarke cu nan lo bay mira cua efecto e lista di flora lo tin riba criadornan di cabrito – mientras cu nan mes a yuda traha riba e lista di matanan!”

Wel sr. director di DNM, e ‘chiste’ aki di Santa Rosa  no mester asombra bo – pasobra casi sigur bo ta bon na altura cu e propio directora di Santa Rosa ta cría cabrito, no kyer cumpra cuminda suficiente pa su animalnan y ta prefera di laga nan malogra nos mondinan den tur libertad!

(2) Ta cuanto persona realmente ta biba 100% di piscamento? Pues, cu ta por lo menos 40 ora pa siman riba lama? Segun mi, un cantidad masha chikito mes! E gran mayoria di nan ta HOBBY-ISTA; esta, nan tin nan trabao y entrada fiho y na banda nan kyer un entrada extra. Y como hobbyista nan ta bringa feroz pa mantene esaki y goza di e ‘free for all’ cu ta existi – probechando di e rikeza di nos awanan, pero nan no kyer contribui na e bienestar general, den sentido di PAGA IMPUESTO riba loke nan ta bende! Ta pa e motibo aki nan no kyer inscribi nan mes na Camara di Comercio.

E hechonan aki ta laga bo cu solamente un conclucion, esta cu e piscadornan hobbyista a perde tur nan credibilidad y hustificacion pa ta rabia y ‘indigna’.

(3) E lista (di pisca) ta basa riba tratadonan internacional na cual nos comunidad ta mara. Y como cu nos no tin un instancia cu ta investiga e cantidad di ehemplarnan di cierto especienan, nos mester proteha nan simplemente door di prohibi totalmente pa saka nan for di lama. Ta te na momento cu nos tin un instancia di investigacion, nos por ta mas ‘suave’ den regulacion di un que otro. Justamente e sortonan mas gusta, mester ser proteha! Pa di tal manera nan no caba por completo den nos awanan! Den e reunion na Paradera e sugerencia a bin dilanti pa regula e piskamento di langusta y a menciona Florida como ehemplo. Wel, ta bon cu e persona NO a menciona cu e hobbyistanan na Florida ta ser permiti pa coy kreeft durante solamente DOS DIA pa aña! Empresanan, cu un vergunning por supuesto, por coy langusta durante 7 luna pa aña. Pa mas informacion encuanto e regulacion na Florida, mira esaki: http://myfwc.com/fishing/saltwater/recreational/lobster/

(4) Desde inicio di añanan nobenta cierto instancianan no-gubernamental a bringa pa institui un parke marino, cubriendo e formacionnan coralino di e punto p’ariba di nos isla te na Arashi – te na un profundidad di sesenta (60) metro. Ami awor ta propone un vez mas pa institui tal parke  y pone un control estricto riba e territorio indica. Si Bonaire ya pa basta aña ta gosando di un parke asina, mi no ta mira motibo pakico nos no por tin algo asina. Ta question di studia bon con nan sistema ta funciona y check cual puntonan nos por mehora – e.o. esun di finanzas. Claramente e ‘conditio sine qua non’ ta cu e ministro encarga cu e cartera di naturaleza, tin e ba….. suficientemente grandi pa bin cu tal parke. Y un tip importante p’e: ta casi sigur cu tal parke por genera suficiente entrada cu e no mester ningun cen di gobierno!

Ademas mester regula den e espirito di e tratadonan internacional e lama pafor di e parke. Loke mester bin mesora ta un proteccion 100%  di e kreeft durante varios aña largo, pa di tal manera duna e sorto aki e chens pa recupera den cantidad grandi.

 

Drs. Adi Rasmijn.

 

- Advertisement -

DUNA COMENTARIO

Please enter your comment!
Please enter your name here