Home Parlamento Evelyn Wever-Croes a reitera cu pa gobierno nobo e ser humano lo...

Evelyn Wever-Croes a reitera cu pa gobierno nobo e ser humano lo ta central

262
0
SHARE
- Advertisement -

Despidiendo di Parlamento saliente:

ORANJESTAD (AAN) – E prome parlamentario cu a hiba palabra despues di a presenta y aproba e credencialnan den Parlamento, ta sra. mr. Evelyn Wever Croes, lider di MEP.

El a cuminza cu e prome punto di agenda, cu tabata gradici e parlamentarionan saliente. El a menciona sra. Lorna Varlack, sres. Jeffrey Kelly, Rene Herde, Chris Dammers, Donny Rasmijn y Norman Roos. Den nomber di pueblo di Aruba, el a gradici nan pa tur e añanan di servicio cu nan a dedica na Parlamento.

El a menciona sr. Adi Thijsen tambe, y a expresa cu dia cu el a drenta Parlamento ocho aña pasa, Adi tabata tey caba, solido manera un baranca. Nan a siña hopi di sr. Thijsen y e mes specialmente, y awe despues di 12 aña di un carera politico hopi impresionante, Adi ta laga Parlamento pa bay na otro nivel.

Tin expresionnan di sr. Thijsen cu sra. Wever-Croes semper a gusta. Un di nan ta: “Politica ta cruel” y otro cu e gusta hopi ta “tanten cu MEP Aruba ta salba”. El a expresa un danki di curazon den nomber di Aruba en general y di MEP en special, pa su trabao den Parlamento y a desee exito den e siguiente retonan cu indudablemente, e lo por sigui sirbi nos comunidad.

E dama a agrega cu nos ta den e ultimo dia di e constelacion parlamentario aki, y cu finalmente e dia a yega pa mira un cambio den nos pais.

El a reitera cu e resultado di eleccion no ta esun cu nan a spera, aunke e no sa si tin hende cu si a spere. Pero e ta un señal unda pueblo ta bisa cu nan kier mira mas union. Segun sra. Wever-Croes pueblo kier mira mas diversidad, un coalicion y tambe un mihor balansa y ta den Parlamento su tarea y responsabilidad pa duna pueblo esey pero nan a faya den esaki. Pero den tur cos den bida tin cu siña y hibe na e siguiente nivel cu nan ta bay cune y e ta sigur cu e parlamento nobo lo sa di cumpli cu loke pueblo a pidi. MEP di su banda ta haciendo lo posible pa interpreta e decision di comunidad, e decision di pueblo pa purba yega na un coalicion mas amplio posible, basa riba algun principio importante: principio di integridad, integridad y bon gobernacion, cu ta loke comunidad a pidi cu nan mester tuma como compromiso; finanzas publico na orden, y esey ta loke nan a siña cu si nos no tin nos asuntonan na orden otro ta bin hacie pa nos. Y finalmente loke pueblo a pidi ta un cambio den direccion y pone e ser humano central. “Nos a mira inversion den infrastructura y den embeyecimento di nos pais, y pueblo a pidi awor, corda riba e ser humano”, entre otro, e lider di MEP a expresa haciendo enfasis riba e retonan y desafionan cu e parlamento y gobierno nobo lo tin nan dilanti riba tur tereno, esta social, educativo, salud, seguridad, etc.

- Advertisement -

DUNA COMENTARIO

Please enter your comment!
Please enter your name here