Home Hudicial Fiscal a exigi 19 luna di prison pa violacion di mucha muher...

Fiscal a exigi 19 luna di prison pa violacion di mucha muher di 12 aña

382
0
SHARE
- Advertisement -

ORANJESTAD (AAN) – E homber Dominicano biba na Aruba O. (26), ta para riba cu e no tabatin relacion sexual cu e mucha muher y mas ainda e ni conoce e mucha muher. Fiscal ta haya O. culpable y a exigi 28 luna di prison di cual 9 luna ta condicional cu un tempo di prueba di 3 aña.

VIOLA MUCHA MUHER

Fiscal a acusa O. cu riba 21 September 2016, el a viola un mucha muher entre 12 aña.

Hues a bisa cu segun e procesverbaal di Polis, e omo di e victima a declara cu e mucha a bin serca dje na yoramento. E mucha a conta su omo, cu el a wordo busca na biblioteca pa e homber O. den un Van color di oro y nan a bay na un apartamento, caminda e mester a haci sex cu O. y un otro homber N.

E omo a bisa e mama y e mama bay haci denuncia. Parce cu hasta e otro homber, lo a filma e relacion. E victima mes a bisa cu el a bay biblioteca y a conoce O. via facebook. Segun e mucha, O. tabata sa cu e mucha tabatin 12 aña y cu O. a bay busk’e na biblioteca pa tin relacion sexual cun’e. E mucha a bisa cu e homber O. y N. a tene relacion cun’e. Segun mucha no ta promer biaha cu e tin relacion cu O. Promer biaha O. lo a bay cun’e caba y cu O. lo a menaza cu un arma. Segun e mucha el a pidi O. pa stop pero O. a sigui.

SOSPECHOSO TA NENGA

  1. a bisa Hues cu e no conoce e mucha. El a bisa cu el a compronde cu e mucha y su mama, ta cliente di su mama cu tin un beauty salon y cu e no sa nada di loke e mucha a bisa. Hues a puntra O. tocante e Van color di oro. E sospechoso a sigui bisa Hues cu e Van color di oro en realidad no ta di dje sino di un Colombiano y el a registra e Van riba su nomber. Pero e Van tin basta tempo para.

Hues a remarca cu na Polis, O. a bisa cu e no tin un Van. Segun O. e tabata hopi nervioso pa e acusacion falso contra di dje pero awor den Corte e ta bisando e berdad.

Hues a puntra O., con e mucha conoce O. y O. no. Segun O. nan ta bay na e beauty salon di su mama pero e ta biba patras. O. ta para riba cu e no conoce e mucha. Hues a remarca con e mucha por bay duna declaracion contra O. di e forma aki si e no conoce O.

Hues a bisa cu tin dos otro mucha muher tambe a declara contra O. Segun O. un di e muchanan e conoce. Hues a bisa cu un di e muchanan ta bisa cu na 2015 el a wordo abusa tambe door di e O. Segun O. esey no por ta asina pasobra desde 2013 e ta biba cu su acompañante y nan tin dos yiu.

Hues a remarca cu tin tres mucha muher ta declara contra O. y O. ta para riba cu no ta berdad. Ta asina cu desde 22 April 2017, O. ta sera.

EXIGENCIA FISCAL

Fiscal a bisa cu hopi biaha den casonan di abuso sexual tin e declaracion di e victima contra e declaracion di e sospechoso. Fiscal ta haya cu den e caso aki e ta un poco mas facil. El a mustra riba declaracion di e victima, su omo y su mama. Ora e mucha a bisa su omo, e tabata hopi emociona. E mucha ta bisa cu ta O. y O. ta bisa cu e no conoce e mucha. Esaki ta sorprende Fiscal.

Na opinion di Fiscal, O. no por splica pakico e mucha ta acus’e. Esaki ta incomprendibel. Fiscal a bisa Hues cu e ta haya cu O. ta gaña riba e Van color di oro. Promer e ta bisa cu e no tin un Van color di oro y den Corte e ta bisa cu e Van ta di un conoci Colombiano.

Fiscal a sigui bisa cu ariba dje tin declaracion di dos otro mucha cu ta caba convence Fiscal cu O. ta culpable di a viola e mucha muher.

Fiscal ta di opinion cu O. lo tin e costumber di tene relacion cu muchanan entre 12 y 13 aña. Fiscal ta considera esaki un situacion di “lover boy”. El a bisa cu no por prueba cu O. lo a forza e mucha pa tene relacion cu un otro. El a pidi Hues pa declara O. liber pa e acusacion aki.

Fiscal ta haya cu mester exigi castigo pisa pa mustra O. cu e no por tin relacion sexual cu mucha menor di edad. El a exigi 28 luna di prison di cual 9 luna ta condicional y un tempo di prueba di 3 aña.

DEFENSA

Abogado mr. Mohamed ta haya cu no por prueba cu O. a abusa di e mucha y mester declara O. liber.

E abogado a menciona un sentencia di Hulanda caminda ta mustra cu no por bay tras di declaracion di solamente un persona so sino mester busca pruebanan di sosten. Mester busca otro fuentenan. Na opinion di e abogado, e declaracion di e omo y e mama ta basa riba loke e mucha a conta nan.

El a mustra cu e mucha promer ta bisa loke a sosode na biblioteca pero despues ta bisa cu a sosode mas biaha den auto di e mama di O. y cu esaki bou menaza di arma. E abogado a remarca cu e tempo ey, ningun hende a ripara cu e mucha tabata spanta y cu ta promer biaha cu e ta tene relacion sexual.

E abogado a sigui bisa cu e mucha mes ta bisa cu e tabata haci’e pasobra e tabata haya “leuk”. No a papia ningun momento di menaza. E abogado a remarca cu ta straño cu un persona cu a wordo menaza cu arma, di su mes ta bay busca contacto cu e persona bek y ta bay tene relacion sexual atrobe.

Hues a cera tratamento di e caso y a bisa cu e ta bay studia e caso bon. Hues a bisa cu dia 10 di November 2017 lo por spera sentencia.

 

- Advertisement -

DUNA COMENTARIO

Please enter your comment!
Please enter your name here