Home Politica Glenbert Croes cu advertencia pa DIP y tur NV di gobierno relaciona...

Glenbert Croes cu advertencia pa DIP y tur NV di gobierno relaciona cu actonan di corupcion

503
0
SHARE
- Advertisement -

“Esnan cu ta cooperando cu un conducta ilegal ta bira complice di e ilegalidad”

ORANJESTAD (AAN) –  Glenbert Croes, di Partido MEP, a yama un conferencia di prensa, den cual el a aborda un tema

El a menciona cu mientras cu e lider di MEP ta haciendo tur esfuerzo hunto cu e otro dos partidonan, pa yega na un coalicion pa un gobierno nobo, segun resultadonan di eleccion di 22 di September ultimo, por tuma nota di un conducta, actitud y maneho den diferente departamento publico cu no ta corecto.

E actitud aki no ta conforme cu e periodo di transicion pa un gobierno nobo, cu nos pais ta den dje awor. Tin departamentonan di gobierno cu ta hiba nan maneho comosifuera cu ainda AVP ta na mando, siendo cu e gobierno aki a wordo rechaza den e ultimo eleccion.

“Nos kier manda un mensahe di alerta y advertencia na DIP (Directie Infrastructuur en Planning). Nos a compronde cu ainda nan ta purbando di saca varios tereno, cu gobierno a duna den periodo demisionario, y internamente nan ta cooperando pa e terenonan aki wordo otorga”, Glenbert Croes a subraya.

Croes a subraya cu esnan cu ta cooperando cu un conducta ilegal ta bira complice di e ilegalidad y posible corupcion den cual e terenonan aki ta involucra y esaki ta completamente inaceptable y e lo trece consecuencianan.

“Pa loke ta trata DIP nos kier pa tur hende sa cu riba tur tereno cu wordo otorga e ultimo ocho añanan aki un investigacion lo wordo haci, con esaki a bay, y tambe esnan unda construccion a tuma lugar riba dje. E otorgamento di terenonan erfpacht cu ta propiedad di gobierno lo wordo investiga y obviamente esnan culpable lo wordo poni responsable. No solamente e minister por ta corupto pero esun cu ta paga y coopera pa corupcion, tambe lo wordo poni responsable”  segun Glenbert Croes.

 

REFINERIA

Fuera di e asunto di DIP y reparticion di tereno cu ta hole corupcion, segun Glenbert Croes MEP ta tende cu riba tereno di refineria di Aruba, tin diferente contratista ta lantando, vinculando nan mes cu exponentenan politico di partido AVP y tambe cu ehecutivonanan cu tin cierto agreement cu gobierno.

Glenbert Croes a duna di conoce cu nan ta registrando esakinan pasobra nan intencion ta pa na momento cu gobierno nobo sinta, MEP kier pa tur contratista local haya un prome chens, preferencia, locual no ta tumando lugar, mescos cu nos trahadornan local. Un di e cosnan cu mester haci ta prepara y forma nos mes hendenan aunke hopi di nos localnan ta bon califica, pero nan tin hopi aña sin traha den e refineria y nan mester re-train pa nan ta completamente al dia, encuanto e trabaonan aki y e responsabilidad cu mester tin pa nos propio trahadornan asumi e refineria.

“Nos kier pa tur e ehecutivonan di CITGO sa cu nos ta registrando e intento cu ta wordo haci aworaki, pa purba hinca diferente NVnan liga na politiconan di AVP y directornan di NVnan di gobierno pa camufla e corupcion cu ta bay tuma lugar den e ehecucion di e obra di e refineria. Manera nan ta bisa: ‘nan ta repartiendo un bolo cu te ainda no a drenta fornu”, segun Glenbert Croes.

El a subraya cu tin roncamento di ciboyo ta ken ta haya kico den e refineria, pero e gobierno nobo ta bay concentra den inversionnan cu lo mester tuma lugar.

Tambe el a  manda un mensahe na ATA NV pa wanta su plannan pasobra un gobierno nobo ta bay drenta cu su mesun plan di gobernacion, su propio vision cu no ta esun di AVP y cu tur NV di Gobierno mester tene cuenta cu esaki.

- Advertisement -

DUNA COMENTARIO

Please enter your comment!
Please enter your name here