ORANJESTAD (AAN): Jardin di Primavera ta celebrando 3 aña di existencia. Jardin di Primavera ta un club pa mucha y joven entre 4 cu 16 aña cu ta reuni tur diasabra entre 3or y 5or di atardi na club primavera pa tene e mucha y jovennan bezig riba un diasabra.
Ta organisa diferente actividad manera charla, buitendag, show, lesamento, presentacionnan educativo pa informa e hobennan riba diferente topico.
En conexion cu celebracion di e tercer aña di e club, ta organisa un talent show diabierna dia 6 di oktober cuminsando 7or di anochi na club Primavera.
Lo tin 2 categoria pa presenta, 5 pa 7 aña y 8 pa 12 aña. Talentonan cu lo presenta ta baile, canto, magia, dj, playback y mas.
Durante e ultimo simannan e participantenan a traha duro pa por presenta un bunita show. Awor tur cos ta cla pa nan presenta esaki na e publico! Bini uno, bini tur pa celebra ciere di vakantie di oktober!
Grandi y chikito, tur ta bon bini pa presencia e show aki!
Lo tin tickets obtenibel na porta pa tur cu ta desea di presencia e show aki!
Show ta cuminsa 7or. Bar y cushina di Club Primavera lo ta bon surti!! Un anochi di Baile, Canto, Dj, Playback, Magia, Fantasia y hopi mas!! Jardin di Primavera ta wardabo sin falta!!
