Home Politica Jocelyn Croes a refuta ponencianan publica den media

Jocelyn Croes a refuta ponencianan publica den media

360
0
SHARE
- Advertisement -

E ta respeta e votonan di Alan Howell

ORANJESTAD (AAN) – Jocelyn Croes, miembro di Partido POR, den conferencia di prensa a refuta diferente publicacion cu a sali den media, cu no ta corecto.

El a subraya cu na ningun momento el a cede su stoel na Alan Howell pasobra stoel no ta di dje, y no ta pasobra el a firma un protocol ni pa motibo cu e ta leal na e partido, absolutamente cu no, pasobra e ta haci lo corecto.

El a expresa cu el a wordo lanta door di un tata, cu semper ta bisa “bo palabra ta oro”, kiermen cu bo ta para pa bo principio y semper cumpli cune.

“Esey ta loke mi ta haciendo tambe, door di respeta e votonan di Alan, pero mi ta para firmemente tras di e hecho cu cuater aña pasa caba e ta suppose di haya e stoel ey den Parlamento. Y mi ta vocifera pasobra mi a papia recientemente cu Gerlein y mi a bise cu mi no ta compronde con otronan cu tin apenas 100 voto, ta drenta prome cune na Parlamento, cu su 900 voto. Esaki ta conta tambe pa un Clayton, un dr. Vallejo, pa Gerlein cu a haya hopi mas voto cu otronan cu ta drentando Parlamento. Mi no ta kere den dje, mi no ta para su tras. Mi ta kere cu bo mester duna honor na bo mes pasobra na final di dia, ora cu nos a bay eleccion 22 di September, ta pa un Parlamento, no pa un Gobierno.

Lamentablemente, nos sistema di vota aworaki ta duna un resultado diferente. Bo tin un Ersel Arends, cu tin hopi mas voto cu mayoria di hende cu ta drentando Parlamento. E ta algo cu kizas den futuro, via referendum, ta un cos pa considera si ta algo cu nos kier keda voto manera nos ta votando of nos kier vota separa pa Parlamento. Pero definitivamente ta algo cu pueblo mester scoge pasobra e ta e futuro di bo pueblo. Pero ta algo cu mi a scucha hopi durante campaña y mi ta para su tras. E ta duna un bista real tambe cu bo ta vota pa esnan cu bo kier pa drenta Parlamento”, sra. mr. Jocelyn Croes a expresa.

E dama a agrega cu pa e ta un honor di a core campaña y e ta duna honor y respet tambe na Alan, pasobra ta hopi dificil pa retene e votonan ricibi cu un partido grandi, ora bo cambia pa un partido nobo.

“Mi ta duna honor na pueblo di San Nicolas cu cuater aña pasa a bisa cu nan kier mire den Parlamento, y mi sa cu e lo haci un bon trabao. Mi no ta duda di esey. Pa tur esnan cu mi ta topa riba caya, cu a vota pa mi, cu ta bisa mi Jocelyn ‘e stoel ta di bo, no lague bay’, ‘kico bo ta haci awo nos kier wak bo traha’ mi ta bisa pa no tene miedo, mi ta bin pa keda, mi lo traha di un forma of otro, mi a mustra mi disponibilidad caba na Andin y Otmar cu, cu poder di Dios nos logra forma, mi tin mi experiencia y gana di traha. No mester ta den Parlamento pa mi traha, tin otro forma cu mi por sirbi Aruba y paden of pafo di gobierno lo mi sigui vocifera, lo mi sigui traha, boso lo sigui scucha di mi” sra. Jocelyn Croes a conclui.

- Advertisement -

DUNA COMENTARIO

Please enter your comment!
Please enter your name here