Home Politica MEP kier mantene un minimo di 5 minister pa su partido

MEP kier mantene un minimo di 5 minister pa su partido

559
0
SHARE
- Advertisement -

ORANJESTAD  (AAN): Durante dia di  diabierna, 20 di October, faltando solamente 7 dia pa e Parlamento nobo sinta, formador sra. mr. Evelyn Wever-Croes, a tene su prome briefing cu Gobernador, pa pone na altura, con tur cos ta bayendo pa loke ta formacion di e gobierno nobo aki, cual ta un Gobierno di coalicion entre MEP y e otro dos partidonan POR y RED.

Akinan el a trece varios punto dilanti. Durante e siman cu a pasa tambe, tin cu agrega cu varios reunion a tuma luga, entre e partidonan mes, entre formador y e diferente comisionnan di negociacion y tambe reunionnan bilateral como tambe individual.

Durante un entrevista despues di a reuni cu gobernador, Evelyn Wever-Croes, a splica cu e refleho di tur e discusionnan cu tin den comunidad, ta hay’e tambe na mesa cerca nan. E ta den un grupo mas chikito. E ta puntonan cu ta papiando riba dje. Ta saliendo for di e mesun punto di salida ainda, pero no por anticipa. Tin cu tira awa den biña y ohala cu no ta riba e punto aki.

4-2-1 ta dificil pa mantene

Como lider di MEP, si e mester bay bek den seno di MEP, e cantidad di ministernan pa partido di 4-2-1, ta dificil. Pasobra e no ta refleha e respaldo di 9 asiento pa MEP, 2 di POR y 1 di RED. Pero, no por delanta, e ta un punto hopi dificil.  E minimo ta 5-1-1 e ora. Un posibilidad ta cu MEP por sacrifica un minister, e ora acomoda uno otro na Hulanda di un otro partido. Segun Wever-Croes, nan no a yega eynan ainda. Tin tambe algun otro posicion cu ta importante pa por bay wak y den e totalidad eynan, cu cada ken ta sinti nan mes comodo cun’e.

E encargo maximo por bay wordo nota naturalmente cerca MEP refleha, den e cantidad di ministernan. Ta purba di trece e refleho den e resultado di eleccion den e 9 asientonan di MEP, 2 di POR y 1 di RED mas tanto posibel.

Esey ta e punto di mas crucial. Hasta gobiernonan cu tabata nan so na mando, por mira e efecto di isla. Corda un Gobierno di coalicion. Ta pesey ta importante pa haci palabracionnan awo.

Por tin desviacion, pero ohala cu no. Mescos cu por tin desviacion tambe den cierto ponencia, posicionnan cu un partido por tabata fel contra algo y awor aki, pa bo yega na un coalicion, bo tin cu yega na palabracionnan y benta awa den biña y e ta keda dificil.

 

Con ta purba di yega na e palabracionnan?

Prome ta e vision. Kico bo kier logra den 4 aña. Bo kier legalisa uzo di cannabis medicinal. E ta bay den man di un partido cu por ta no tabata tin’e como number 1 den su cartera, pero bo kier pa esey wordo palabra. Mester un plan con ta yega na dje. Pero tambe palabracionnan riba e con ta bay traha cu otro, no solamente kico lo logra, pero con lo consulta cu otro. Awor aki ta tratando e tema, cuanto consehero, cuanto staff di cada minister mester ta. Ta palabracionnan cu kier haci delanta. Tur hende ta firm’e. Tin manera un tipo di protocol, pero for di delanta tur ta palabra, cu un minister, e ta bay tin un consehero. Ban pone cu bo tin un minister cu tin salubridad y medio ambiente, e ora eynan bo tin un consehero, por ta cu ta bon den salubridad, pero mester tin uno pa medio ambiente. Cuanto secretaria tin mester, uno cu ta atende cu begroting, uno cu ta yuda cu trabaonan manera driver, of bode. Tur eseynan, a haya un indicacion caba di DRH, con nan ta weit’e. E ta un parti di palabracionnan concreto cu ta purba di haci awo, mientras cu ta papia di programa tambe, pa tin palabracionnan delanta.

Si yega na un conclusion cu tin cierto ministerio, debi cu ta wordo poni dos of tres hunto, por haya un maximo di 15 trahado eynan, ta 15 e ta. Si un dia un minister tin su 15nan caba y kier pone 2 mas, esaki no por. Pero por papi’e eventualmente. E tipo di palabracionnan ey cu sa cu semper ta trece friccion, ta purba di adelanta papia di nan awor aki.

Ainda nan no tin como formador contacto cu Hulanda pa atende e temanan cu ta andando pa formacion di Gobierno nobo. Evelyn Croes ta splica cu como formador  e no tin e autoridad pa cuminsa. Hulanda por bisa ta ken ta Evelyn Wever-Croes, e ta lider di MEP na Aruba, miembro di Parlamento, pero formador no ta dunabo mucho mas entrada eynan y Hulanda ta bezig awor aki ta formando nan propio gobierno. Ta warda esey caba y lo ta un bon momento pasobra nan no ta 100% sigur ken ta bira minister cu lo ta encarga cu reino. Ban warda esey cu lo ta den e siguiente dianan aki tambe, mescos cu esun na Aruba, e ora lo tin e contactonan oficial. Inoficialmente a papia caba cu esunnan cu nan conoce eynan. Nan sa con e proceso ta bayendo. Nan ta na altura, nan a haya e acuerdo aki tambe den Hoofdlijnenakkoord. Inoficial, tin contacto. Pero oficialmente ta warda pa nan Gobierno ta cla y esun na Aruba tambe.

 

Un fin di siman hopi ocupa

Ora cu tin mester ta traha te laat. Diahuebs a traha henter dia di mainta pa anochi. Ta puntonan cu tin cu papia di dje. Loke cu ta sinti cu por ta no ta yega na otro, ta pone un banda y esey por ta ta exigi un reunion een op een, por ta. E ora bo no ta keda di mainta te anochi den un sala ta reuni. Ta bay un otro caminda y lo reuni riba loke cu tin cu atende. Pero e ta hopi intensivo y e fin di siman aki lo bay ta uno decisivo.

 

Team di negociacion

A pidi cada un lider pa bin cu un team di maximo 3 persona na mesa. MEP tin un team cu ta consisti tambe di 3 persona, kendenan ta Xiomara Ruiz-Maduro como secretaria general di partido, Gerrit Croes, cu ta presidente di partido y tambe sr. Nilo Swaen como consehero. POR tambe ta bin cu tres hende cu sa varia. Esunnan cu ta bin ta Otmar Oduber, sr. Andin Bikker y tambe sra. Joselin Croes tabata tey y tambe sra. Marisol Lopez-Tromp, cu sa varia.

Di parti di RED, a bin Ricardo Croes y sr. Rudy Lampe. E presidente di partido, sr. Robby Croes tabata den exterior. Evelyn Wever-Croes ta sinta eynan cu dos persona cu ta asistie como secretariado. Cerca nan nan tin sr. Henry Baarh, sr. Jossy Semeleer, cu ta sinta den reunion y tambe sra. Grace Koolman y sra. Tussy Henriquez cu ta asisti, no necesariamente den sala. Esey ta e team cu formador tin na su disposicion. Marlon Werleman no ta den e team di negociacion. Marlon Werleman ta un di e conseheronan di partido MEP, ora cu MEP tabata tin su reunionnan interno. El a yuda y pa MEP tambe e tin hopi trabao ta haci.

 

 

- Advertisement -

DUNA COMENTARIO

Please enter your comment!
Please enter your name here