Home General Meta di ATECH ta pa motiva y inspira mas “startups” pa lanta...

Meta di ATECH ta pa motiva y inspira mas “startups” pa lanta nan propio negoshi

35
0
SHARE
- Advertisement -

Rudy Croes, Co-Fundador di ATECH:

ORANJESTAD (AAN):  E di tres conferencia ATECH a cuminza Diahuebs atardi y den cuadro di esaki a tene un entrevista cu Rudy Croes, Co-Fundador di ATECH.

Tres aña pasa un grupo di amigo a sinti falta di tecnologia y innovacion na Aruba como tambe ser a conoci cu hendenan cu e mesun pensamento. Cu a studia y cu awor ta un entrepreneur.

Di e forma aki a surgi e idea di bin cu e conferencia ATECH y awor ta e di 3 aña cu nan ta organizando e evento na e isla di un manera exitoso. El a bira cada aña mas grandi y nan tin hopi partner como startups rond mundo cu ta bishita Aruba, Croes a laga sa.

ATECH a wordo nombra door di Forbes Magazine como un conferencia den e “Top 15 tech-conferences”  rond mundo. “Esey a yuda nos pa haya hopi exposure pafo di Aruba. Nos a acerca speakernan internacional, nan mes tabata busca riba e website, busca mas info di ATECH Conference y nan ta wak cu ta un bon conferencia”, a bisa.

Ora di acerca e speakernan ta hopi mas facil pa trece nan Aruba. Esaki ta trece cune cu hopi compania kier manda nan trahadornan pa asisti na e conferencia pa asina busca inspiracion, Rudy Croes a manifesta.

Pa loke ta Forbes Magazine, el a indica cu e representantenan di e revista a busca informacion di tur e conferencianan di tecnologia y innovacion cu tin rond mundo. Nan a haci un seleccion y ATECH Aruba a cay den e Top 15 hunto cu TNW Conference di Hulanda cu ta un di e conferencianan mas grandi di tecnologia na mundo.

“Como un isla chikito semper nos ta sali den e topnan y aworaki ta den e parti di innovacion”, e co-founder  di ATECH a indica.

Pa loke ta e aña aki tin masha hopi interes di e localnan. Mas di 600 hende a cumpra nan ticket y ta spera cu pa awe y diasabra ta bay tin hopi hende mes ta acudi na Hilton Hotel pa atende e conferencia, a agrega.

“Pa mi e parti mas importante di e conferencia ta pa e hendenan sali motiva, inspira pa nan bay implementa loke nan ta tende na nan mesun compania unda nan ta traha. Mi ta spera cu mas startups lanta for di e conferencia aki locual mi ta haya falta akinan na Aruba. E parti di networking, nos tur mester di otro pa sigui. Esey ta hopi importante”, Croes a expresa.

Rudy Croes ta un hoben cu a studia Communicatie Systemen na Hulanda. Na 2010 el a caba y el a keda traha 6 aña na Hulanda cu companianan grandi. Despues el a haya oportunidad di bin Aruba y a lanta su mesun negoshi cu ta focus riba desaroyo di websites, mobile apps y tur loke tin di haber cu tecnologia digital.

Den tres aña nan a crece den un team di 5 persona, el a laga sa.
 

- Advertisement -

DUNA COMENTARIO

Please enter your comment!
Please enter your name here