Home Deporte Mini-Veld Anchi Maduro: Un Soño Cu A Bira Realidad

Mini-Veld Anchi Maduro: Un Soño Cu A Bira Realidad

135
0
SHARE
- Advertisement -

ORANJESTAD (AAN): Den fin di siman tabata tin un celebracion grandi den e bario di Washington. Motibo di e celebracion unico aki tabata e gran apertura di e mini-veld.

Manera ta conoci, e gobierno di Aruba bou liderazgo di S.E. prome Minister Mike Eman, a tuma e iniciativa di pone varios cancha chikito (turfvelden) pa nos conoci como mini-veld den varios bario di Aruba.

E biaha aki a toca turno na e bario di Washington, na e veld di Nacional. Esaki sigur cu e bon ayudo di COA.

Sra. Gabrielle Croes, miembro di bestuur di Nacional Division Hubenil, a habri e atardi aki gradiciendo tur cu a haci e projecto aki posibel. Sigui pa e palabranan bunita di nos Prome Minister Mike Eman, cu a keda hopi satisfecho di por a contribui cu e cancha aki. Pa asina no solamente por crea mas deportista na Aruba, sino tambe pa promove movecion cerca nos muchanan. Siguientemente e representante di COA, sr. Roy Mezas a hiba palabra. Aki el a enfoca ariba e importancia di deporte na Aruba y tambe a felicita Nacional cu e bunita cancha aki. Tambe el a menciona e bon trabou di sr. Dito Acosta cu semper sa di “make things happen”.

E parti mas bunita di e atardi aki tabata e dedicacion di e mini-veld na sra. Anchi Maduro. Esaki tabata un sorpresa pa juffrouw Anchi. E tabata hopi emociona y agradeci cu e dedicacion bunita aki. Desde cu Scol Preparatorio Washington a habri den e bario di Washington na aña 1997, Juffrouw Anchi a inculca e amor pa cu deporte den e chikitinnan.

Como cabesante di scol preparatorio Washington for di 1997 te cu 2013, el a participa na diferente campeonato di futbol escolar. E chikitinnan aki a crece bay Scol Basico Washington, caminda juf Anchi semper a keda apoya nan. Na aña 2005 Scol Basico Washington a gana e titulo di Futbol Escolar di Aruba. Asina aki a representa Aruba na e campeonato Interinsular ABC na Boneiro, ganando esaki pa prome biaha pa Aruba.

Esaki tabata e mecha tambe pa un grupo di juffrouw y mayornan, hunto cu nan juffrouw Anchi, lanta e team di Sport Club Washington na aña 2005, pa asina participa na e campeonato di Lifida. Na aña 2012 a uni cu e team di Nacional. Juf Anchi, un coach cu hopi amor pa su muchanan y pa cu e deporte di futbol. E semper tabata encarga cu e team mas chikito, Sub 5, pa e equipo di Nacional.

E atardi a culmina cu un wega amistoso entre e team cu juf Anchi ta coach, esta Sub 5 y e team Sub 7 di Nacional. E muchanan a gosa di por a hunga riba un cancha bunita di yerba artificial.

Cu e mini-veld aki Nacional kier a gradici na prome luga Gobierno di Aruba, COA y tur esnan envolvi den e proyecto aki. Tambe a gradici sr. Ruben Pietersz, cariñosamente yama Opa, pa semper tey pa yuda tur e teamnan di Nacional.

Juffrouw Anchi Maduro:

Un señora, un juffrouw, un fuente di inspiracion y adimiracion. Laga juf Anchi ta un ehempel pa nos tur!

Ariba e potretnan por aprecia un parti chikito di e tremendo atardi.

- Advertisement -

DUNA COMENTARIO

Please enter your comment!
Please enter your name here