Home Labor Na Aruba tabata tin varios derecho di e trahado cu a keda...

Na Aruba tabata tin varios derecho di e trahado cu a keda stanca

33
0
SHARE
- Advertisement -

ORANJESTAD(AAN): Magali Brito, secretario general di SEPPA, a splica cu tin diferente promocion pa e trahado publico cu a sali. Tin diferente derecho di trahadonan cu tabata stanca pa varios aña, entre otro gratificacion den caso di tanto aña di servicio, ta haya cu despues di un aña ainda e hendenan no ta haya ningun reconocimento pa esakinan. Hopi di nan a sali. Tin cu bisa tambe cu e departamento di Recurso Humano a haci hopi trabao den eficiencia, den mehora nan sistemanan di cual cu ta percura tambe pa hopi di e trabaonan aki ta sali hopi mas lihe cu antes tabata tuma luga.

Tin un cambio grandi den departamento di Recurso Humano. Como organizacion el a mehora hopi mes. Ta contento cu esaki y lo tin mas cu nan lo tin deseo, pero eseynan tambe ta bin na caminda, segun Brito.

Por bisa cu SEPPA tin miembro na tur departamento di Gobierno y tambe e fundacionnan, cu ta worde trata igual como ambtenaar. Den sector publico sin laga afo ambtenaarnan, un punto hopi importante pa SEPPA, pero tambe pa e fundacionnan ta pa bin claridad kico ta e intencionnan di un Gobierno pa e fundacionnan. Ta asina cu tin dos pa tres aña bringando, siguiendo un desaroyo unda cu Gobierno kier hala e sistema di duna subsidio na e fundacionnan y pas’e den man directamente na e respectivo directivanan.

Tin hopi obhecion pa esaki. Prome, pasobra e richtlijnnen subsidieregeling, ta un acuerdo cu a worde negosha den añanan 90, cu ta regla y ta trece stabilidad pa e trahadonan di fundacion, cu ta brinda un servicio cu na principio ta di un Gobierno. Como Gobierno, mester percura pa e hendenan aki worde bon paga, worde bon compensa y cu ta gosa di e mesun condicionnan cu un empleado publico. Berdad, nan ta cay bao di otro dunado di trabao, pero e responsabilidad primario ta di un Gobierno.

Eynan kier haya claridad pa esey kico ta e intension y pa nan, como Gobierno tambe compronde cu eynan tin diferente buraco. No ta paar di aña pasa tabata tin un minister ta declara cu di diferente directiva di e fundacionnan no tin e suficiente capacidad pa dirigi organizacion.

Ta papia hopi awendia di Good Governance, nan no ta comprende nan rol den esaki. Teniendo cuenta cu expresion ey mes di un gobernante, pa SEPPA ta incomprendibel kier bay den un direccion na unda cu ta laga e bienestar of e trahado den man di hende cu segun nan den man di hendenan cu no tin capacidad.

Eynan tin un tarea pa por brinda e formacion, pa e hendenan comprende nan rol como Raad van Toezicht di un besuutr di un organizacion of fundacion pero tambe nan rol como dunado di trabao.

Di otro banda, como empleado publico, mester tin e siguridad, siguridad di empleo. Tin diferente trahado cu nan merece un claridad riba nan posicion laboral. Y tambe e mester tin e respet y cumplimento cu e derechonan cu nan tin. Locual cu tin acorda caba y eventual negociacionnan cu ta desea pa tin futuro.

Naturalmente ta habri pa continua cu cualkier discusion, cualkier dialogo na mesa, pa por yega na entendimento, na bienestar di e sector publico, servicionan publico cu lo mester duna calidad, pero tambe pa nos hendenan por gosa di beneficionan atractivo pa nan por sigui brinda e servicio na comunidad y ta productivo, mescos cu ta worde pidi for di nan.

Semper SEPPA a bisa cu privatisacion un NO, completo na esaki. Ta mustra cu experiencia na Aruba mes, no tur caminda el a funciona. Por ehempel Postkantoor. Ta wak awendia. E tempo ay caba a adverti Gobierno cu un departamento cu ta mira su futuro, pero ta mira tambe cu e servicio cu nan ta brinda na e momento aki, si bo no trece cambio of bin cu otro, na caminda lo dal contra un muraya. Awendia ta mira con Postkantoor ta struggle. E ta tratando y SEPPA tambe ta sostene e NVnan aki. Pero naturalmente e ta cu hopi dolor di cabes.

Tin ta funciona mas miho. Bo ta mira un compania di transporte manera Arubus, con ke sea e ta keda un poco manera wanta na subsidio di Gobierno. Pero bay den e direccion eynan, segun Brito. Postkantoor tambe tin subsidio di Gobierno. Awor aki e trahado mes ta mira e tipo di structura fragil eynan, nan no lo kier bay den nan.

E ta fácil pa bisa cu e aparato gubernamental ta grandi. Ultimo ta tende cu ta 1000 empleado y despues 2000. Ta facil pa bisa cu tin hende dimas y cu tin cu bay cas. Si bo no tin un analisis pa prueba esaki, e ora ey no sa di kico tur hende ta papiando. SEPPA sa cu por ehempel e ultimo añanan, constantemente tabata tin reorganizacion.

A evalua e departamento, a establece su vision y tambe hunto e cantidad di empleadonan cu tabata necesario pa e por funciona. Tur esakinan a mustra di ta exitoso. Si sigui e trayectonan di cual tin diferente reorganizacion pendiente, e documentonan hopi leu caba pa simplemente keda acorda. E ora por brinda un loke tin un servicio publico di calidad, manera cu tur ta desea.

- Advertisement -

DUNA COMENTARIO

Please enter your comment!
Please enter your name here