ORANJESTAD (AAN): Dos disturbio den Caribe ta wordo vigila di cerca door di National Hurricane Center.
DISTURBIO 1: Imagennan di satelite y observacionnan na superficie, a indica cu un area grandi di presion abao a forma riba parti zuidwest di Caribe, net banda di Panama y Costa Rica.
Condicionnan di tempo ta parce di ta bon pa esaki desaroya, y e sistema aki lo por bira un Depresion Tropical dentro di algun dia, mientras e ta sigui move poco-poco rumbo Noordwest pa Nort. Kizas pa fin di siman e lo ta den Golfo di Mexico.
E sistema aki lo por produci yobida pisa riba algun area di Centro America den e proximo dianan aki.
DISTURBIO 2: Un depresion di presion abao ubica riba Cuba y cerca di noordwest di Bahamas, ta produciendo un area grandi di awacero desorganiza y rafaganan fuerte. Aunke desaroyo significante di e sistema aki no ta wordo anticipa debi na biento fuerte na nivelnan mas halto, toch e sistema aki lo produci hopi yobida y biento riba cierto area di Bahamas y Florida e siguiente dianan.
PRONOSTICO PA ARUBA: Mientras tanto, e pronostico pa Aruba ta mustra cu awe Diaranzon, tempo ta parcialmente nubla cu localmente un awacero. Temperatura maximo lo ta 33ºC y minimo ta 28ºC.
Pa awe, e atmosfera regional lo contene suficiente humedad pa pone cu temporalmente mas nubia lo forma. Pa e motibo aki por spera un awacero breve riba Aruba.
Biento ta modera for di generalmente Pariba entre 12 y 30 km/h. Den dia e ta basta fuerte te posiblemente fuerte den rafaga entre 31 y 50 km/h.
Olanan riba lama ta for di Pariba cu altura di 3 te 5 pia, cu na parti nort e olanan di mas halto.
