Home Turismo Orador principal Cascais lo comparti con un destinacion por ta exitoso den...

Orador principal Cascais lo comparti con un destinacion por ta exitoso den industria crusero

11
0
SHARE
- Advertisement -

Cruise Symposium Aruba

ORANJESTAD (AAN): E siman aki lo tuma luga e di 3 edicion di Cruise Symposium Aruba. Obhetivo di e evento aki ta pa comparti y ilustra tur e desaroyonan den e industria di crucero di Aruba cu invitadonan di nos comunidad local.

Aruba Tourism Authority a invita Amilcar Cascais como e orador principal pa cu e evento aki. Cascais (cariñosamente yama Mico) ta originalmente di Portugal y ta un veterano den e industria crucero cu mas cu 30 aña di experiencia. Despues cu el a gradua na 1984 na West Virginia University (Merca), el a tuma un trabao na un ‘shipboard hotel’ como Junior Purser (comisario) na e conocido Carnival Cruise Lines. Intencion tabata pa e keda solamente pa un tempo cortico, pa asina e por haya experiencia den e industria. Pero esaki a para bira su carera. Una bez abordo, den un tempo relativamente cortico, Mico a bira undi e hotel managers riba lama mas hoben di mundo.

Na aña 1995 Mico a forma parti di Renaissance Cruises den e posicion Hotel Manager specializando den yatenan di luho cu ta bishita destinacionnan popular. Durante e tempo aki, Mico a desaroya su ambicion pa experiencia e exclusividad y autenticidad di cada un destinacion. El a sinti cu cada destinacion tin un storia unico y bunita pa comparti.

Mico a bolbe cu Carnival Cruise Lines na aña 1997 como miembro di e ‘Port Operations’ den e posicion di supervisor pa tres di e crucero cu ta pertenece na Carnival Cruise Lines.

El a establece un departamento nobo cu yama Tour Operations, cual tabata responsabel pa programanan di excursion na e diferente destinacionn cu e barconan crucero ta bishita. E programa lo worde ofreci na e turistanan crucero den tur e barconan di Carnival. E responsibilidad di e programa aki tabata pa cada un destinacion mundialmente, pero en particularmente pa cu e region di Caribe. Bao liderazgo di Mico, esaki a para bira e departamento di excursionnan mas exitoso mundialmente.

Cu exito, Mico a guia e departamento aki pa 19 aña largo pa Carnival Cruise Lines como Vice President di Tour Operations.

Diahuebs awo, Mico lo comparti con un destinacion por ta exitoso den e industria aki for di perspectiva di un linea di crucero. Naturalmente e obhetivo principal –specialmente pa e parti atardi di e programa- ta pa mehora e experiencia di e turista. E audiencia invita ta esnan cu ta envolvi directamente aki na Aruba den e industria di turismo crucero. Esey ta inclui entre otro tour operators, shipping agencies, restaurantnan, tiendanan cu ta beneficia di turismo pero tambe esnan cu ta brinda servicio di actividadnan.

- Advertisement -

DUNA COMENTARIO

Please enter your comment!
Please enter your name here