Piscado Alex Farro cu yamada na tur piscado:
ORANJESTAD (AAN) – Pa basta tempo caba ta conoci cu tin e intencion di haci cambio den e ley di piscamento. E tema aki a bolbe bin dilanti, y segun e piscado Alex Farro e miho cos cu por sosode ta laga e ley caminda e tabata pasobra cu e cambio aki ta bay mishi cu e pan di e piscadonan.
Sr. Alex Farro ta miembro di e directiva di Hadicurari y e ta un di e principalnan para na banda di e piscado ya cu e ta den e trabao aki tambe.
El a sinti cu nan a wordo uza, despues di a sinta cu esnan concerni. El a expresa cu loke nan ta sinti, nan no por expresa. “Ta tur tabata hende grandi y pa nan tuma bo di haci den bo cara” segun sr. Farro su punto di bista.
El a agrega cu tur esnanan cu tin 22 aña drumi, bin dilanti dia 10 di October y bisa nan ken a manda saca e ley y pa ki motibo.
“E ley aki no ta na fabor di ni un hende. Den futuro e ta kere cu tur hende tene cuenta cu prome cu nan pasa un ley, pa nan sinta cu e piscadornan. Di otro banda, ta e piscadornan y e cunukeronan ta esnan cu ta produci algo pa Aruba. Anto cu net cu esakinan e gobierno ta mete, y ta kita tereno for di nan, pa duna compinchinan.
Sr. Farro ta haci un yamada pa caba cu e situacion aki, wak pa nos mesun hendenan prome cu pa haci fabornan.
“Kizas esaki ta un manera pa yuda e barconan di afo cu ta trece pisca di afo pa bende, y laga nos mesun hendenan local cu ni pisca nan lo no por bende mas”, segun Sr. Farro. “Si ni un hende ta stop e asunto aki, ta nan como piscado lo mester para na waf pa stop cu e situacion aki”, el a agrega.
Cu nan ta registra na Santa Rosa como piscado ta suficiente, nan no tin mester di bay registra ningun caminda mas, menos na Camara di Comercio. “Mi ta haci apelacion na tur piscado pa e reunion di dia 10 di October. Si no tin solucion eynan, lo mester bay na e Departamento di Natuur en Milieu, aunke nan ta duda cu e directora lo por yega na e reunion aki. esaki ta conta tanto pa e director di Natuur en Milieu como tur e otronan cu nan a sinta cu nan”, segun Sr. Farro a expresa.
