ORANJESTAD (AAN) – Drs. Marisol Lopez Tromp, a hiba palabra den conferencia di prensa di Partido POR, diaranzon mainta.
Lopez-Tromp a referi na e tema di Salubridad Publico, unda el a menciona cu el a tuma nota cu no solamente tabata tin un Comision Central den Parlamento riba e carta cu Minister Schwengle a manda pa Staten, pa asina wak si Parlamento tabata tin cierto preguntanan encuanto e aspecto financiero di su proyecto y tocante e asunto aki el a expresa:
“Ta asina cu como presidente di e Comision di Salud y tambe miembro di Parlamento, mi ta kere cu Minister Schwengle no mester pensa cu pasobra tin un articulo den ley, cu el a bin haya, a base cu el a pidi Departamento Huridico y tambe un Abogado externo pa busca pe un manera pa evita di e bin Parlamento di Aruba, pa haya un machtigen unda, por ehemplo, e tin cu trata e hecho cu e construccion a surpasa miyones di florin, y segun informacionnan cu nos tin ta trata di 100 miyon of mas, ta mas cu normal cu segun ley di Contabilidad, bo ta bin Parlamento pa haya un aprobacion pa esaki”, drs. Lopez-Tromp a subraya.
El a enfatiza cu ta mas cu normal cu e ta bin Parlamento pa haya aprobacion pa esaki. Pero mirando cu for di 2012 tin un articulo poni cu por aumenta e huur, den e caso aki cu e proyecto aki, el a haya ta bon pa busca e buraco aki pa parkeer e surpass di miyones riba e supuesto documento di huur.
“Aki ta caminda cu mi opinion como miembro di Parlamento, ta cu no por ta asina cu den un surpass asina grandi cu ta mas di 100 miyon florin, bo ta hinke bao capa di un aumento di huur anto bo ta busca abogado pa bisa cu esey ta bon, pero bo ta lubida como politico y como minister e consecuencia financiero cu ta bay ta den e presupuesto di Aruba, y no ta ni un persona externo ta bay pague, ta pueblo ta bay pague!, Lopez Tromp a subraya.
El a agrega cu na momento cu e placa aki tin cu bay wordo presupuesta hasta den e presupuesto di futuro Parlamentonan, di cual e mes no ta bay forma parti di dje, corda pa e bay responsabiliza como minister. Kiermen, tampoco!
“Mi ta kere cu ta importante pa e haya un aprobacion pa e surplus aki, di Parlamento. Pesey mes mi a sugeri na Juni ultimo pa bin den reunion publico y continua cu reunion publico cu a tuma lugar for di dos aña pasa, unda nos a pidi un rapport di onderzoek y ora mi a baha como Presidente di Staten mi a pidie pa e entrega e rapport aki den Parlamento, despues a sigui otro Presidente di Staten y den e añanan cu a pasa te aworaki e no a tuma lugar; no a finaliza.
Aworaki como Minister Demisionario, el a haya ta bon pa djis manda un carta na Parlamento y bisa cu djis cu e carta aki e ta notifica nos kico a pasa cune, y cu el a tape bao un clausula di huur. E asunto aki no por bay asina. Ni maske bo por hinca cierto asuntonan bao di un clausula di aumento di huur, por cierto di mas cu cinco miyon pa aña y cu ta bay tin un impacto riba nos financieren tekorting den presupuestonan di futuro, abo como minister si bo ta actua bao reglanan di bon gobernacion, bo mester sa cu mester bin Parlamento y splica no solamente kico tin eybao, bao di e articulo ey, y pakico bo a opta pa uza e articulo aki y no bin Parlamento pa djis pidi un aprobacion cu bo lo a haya cu mayoria den Staten y cu te Diabierna awor tanten e constelacion no cambia, e tin”, drs. Marisol Lopez- Tromp a acentua.
E parlamentario a menciona cu, consecuentemente, el a manda preguntanan pe, y cu e ta desea pa e minister contesta nan. “Mi a ripara cu Presidente di Staten a lanta awe cu el a haya ta bon pa defende e Minister y hasta trece padilanti cu mi kier impedi un tratamento di e topico aki den Parlamento. Esey no ta berdad. Mi a djis pidi pa e reunion publico continua, esun cu no a termina di 2015-2016, pa Minister bin termine y pa den un reunion publico of haya aprobacion. Bo no ta haci esaki djis den un reunion chikito of manda un carta y bo mes no ta bin trate”, segun drs. Marisol Lopez-Tromp ken a reitera cu no ta un surpass chikito; ta trata di mas cu 100 miyon florin. Pa sumanan mas chikito gobernantenan mes a haya nan mes den problema. “Bo no tin cu haya bo mes den problema, bo tin cu responsabiliza den Parlamento. Un bez mas, no ta pasobra tin un articulo den ley cu ta laga un tiki habri, bisando cu bo mag aumenta huur den e caso aki bo ta parkeer no solamente loke ta wordo gasta pero tambe e maneho financiero cu lo por a bay robes”.
