Home Politica POR a reafirma firma di Protocol cu esnan cu mas voto lo...

POR a reafirma firma di Protocol cu esnan cu mas voto lo drenta Parlamento

313
0
SHARE
- Advertisement -

Otmar Oduber lider di partido:

ORAJESTAD (AAN) — Diaranzon mainta a tuma lugar e conferencia di prensa di Partido POR, Plataforma e Forza Nobo, semper den e marco di formacion di gobierno di coalicion.

A hiba palabra Otmar Oduber, lider di e partido, Marisol Lopez-Tromp, Andin Bikker y Jocelyn Croes.

Oduber a duna di conoce cu despues di a tene internamente un Conseho di Partido Extraordinario, Diamars anochi, unda cu cierto informacionnan a sali afo, a convoca e conferencia di prensa aki, pa na un manera formal trece diferente informacion.

Oduber a señala cu ainda nan ta den un proceso di formacion di gobierno unda cu nan colega y Formador, sra. Evelyn Wever-Croes, a bishita Gobernador tambe Diamars merdia, pa dune un update di e trabaonan cu su persona ta haciendo; sinembargo, POR su responsabilidad como partido ta sigui y den Conseho di Partido prome cu entrega e credencialnan Diahuebs, di e Parlamentarionan cu  lo asumi responsabilidad inicialmente, di drenta Parlamento lo wordo trata. Den e caso aki ta su persona y Andin Bikker cu a entrega nan documentonan pa forma parti di e 21 Parlamentarionan cu lo forma e siguiente constelacion di Parlamento, despues di eleccionnan di 22 di September ultimo.

E Parlamento lo huramenta dilanti Gobernador Diabierna mainta, pero den e mesun rosea tin e proceso di formacion di Gobierno unda cu e palabracionnan ta cu nan lo keda cla pa Diabierna, y si no, manera e Formador a expresa den prensa Diamars, den e dianan nos dilanti lo formaliza y e ministernan nobo lo huramenta tambe, pa di e forma aki Aruba tin su gobierno conforme e coalicion, cu tabata e expresion cu tabata tin dia 22 di September ultimo.

Oduber a subraya cu den e rosea aki, naturalmente POR, como partido, ta un tiki mas profundo y a pone ehemplo dilanti encuanto algo cu nan a vocifera for di inicio di e fundacion di e partido aki, unda cu tur 29 candidato a firma un protocol pa mustra cu no mester solamente warda riba leynan pa por actua den spirito di pensamentonan y naturalmente norma y balornan cu nan ta para pe, pero cu por haci esaki tambe ora no tin leynan, a base di compromiso di e partido.

Diamars, basa riba e proceso cu a inicia awe, POR a sinta cu miembronan di e partido pa reconfirma e compromiso firma den e protocol y na momento di asumi un gobierno nobo unda dos parlamentarionan lo mester move y drenta, eventualmente, den funcionnan nobo, Dios mediante pa un gobierno nobo, lo tin dos Parlamentario cu lo mester drenta tambe den Parlamento, y den e caso aki si sigui e secuencia di esnan cu a ricibi mas tanto sosten den e ultimo eleccion, e ora ey sra. Marisol Lopez Tromp y sr. Allan Howell lo ta e siguientenan pa drenta.

Esaki a wordo confirma ayera unda cu POR a keda para tras di e protocol y esey ta mustra e respet cu tin pa cada un colega den Partido cu ora nan firma un protocol e ta sagrado pa nan. Otmar Oduber a subraya cu esaki ta tambe e boluntad di pueblo di Aruba, y ta sostene e pensamento cu nan a vocifera den pasado cu esun cu mas voto tin cu drenta Parlamento, y cu ta pone un base tambe pa un bez cu POR forma parti di un proximo gobierno, un di e prome leynan cu mester adapta y cambia, sosteniendo iniciativanan cu ya a caba a cuminza algun aña pasa door di Andin Bikker, y cu a wordo presenta tambe pa sr. Dangui Oduber, recientemente, lo sostene e cambio den e kiesverordering cu lo haci posible naturalmente, cu no ta keda solamente na palabracion interno di partido, pero cu ta haya un base legal den futuro.

 

- Advertisement -

DUNA COMENTARIO

Please enter your comment!
Please enter your name here