ORANJESTAD (AAN): Diadomingo dia a habri masha nubla mes, y maltempo yena cu lamper y strena a azota tanto Curacao como Aruba.
Den un rato di ora cu awa a yobe, henter e area di Pos Chikito a keda inunda. E tabata e prome biaha cu por a mira con e situacion a keda, awor cu e proyecto di Green Corridor ta yegando su final.
Y automobilistanan a keda nada contento. Awa a yena caminda for di Rotonde Pos Chikito bay pariba, tur dos banda di caminda.
A area banda di Rey Hing Supermarket a keda full bao awa, incluyendo pa prome biaha e area banda di Tia Rosa Snacks. Clientenan cu kier a drenta of sali di Rey Hing, tin di pasa den un plas basta grandi.
Un biaha mas, santo y hasta piedranan a los for di e midden-berm di Cadushi y Aloe cu tin mey-mey di e caminda principal di Pos Chikito pa Aeropuerto.
Autonan tabata core y pasa riba e piedranan aki cu a keda plama riba caya, y tabata forma peligro pa autonan, debi cu cualkier piedra por bula bay halto y kibra windshield.
Resto di e isla tambe a sufri di hopi awacero, y inundacion temporal. Diferente ciudadano a haya nan ta bay pafo y coba un buraco den nan cura di cas, pa asina elimina e plas di awa cu a forma riba nan tereno.
E muchanan? Nan tabata diverti nan mes riba Veld di Universal, como cu el a bira casi mescos cu un piscina.
