Home Cultura Post Aruba NV ta introduci buki conmemorativo Simbolonan Nacional di Aruba

Post Aruba NV ta introduci buki conmemorativo Simbolonan Nacional di Aruba

38
0
SHARE
?
- Advertisement -

Obtenibel na Oficina di Post Aruba Oranjestad

?

ORANJESTAD (AAN): Aña pasa, riba 16 di maart, Post Aruba e emiti e serie di stampia “Simbolonan Nacional di Aruba” cual a worde diseña pa e artista Sr. Nigel Matthew, ilustrando nos Escudo, Bandera y Himno Nacional di Aruba.

Departamento Filatelico di Post Aruba a emiti un buki conmemorativo di nos simbolonan nacional cu ta e otro fase di e proyecto realisa aña pasa (e stampianan emiti). El a tarda un poco mas pero tabata di suma importancia pa finalisa cu un producto valioso.

E stampianan y buki aki a worde crea en conexion cu nos celebracion di 30 aña di nos Status Aparte y den e ocasion aki a resalta nos simbolonan nacional (Himno y Bandera cu a cumpli 40 aña tambe den 2016, y nos Escudo 60 aña den 2015) y duna reconocemento na esnan cu a compone nos Himno Nacional.

E buki conmemorativo Simbolonan Nacional di Aruba a worde produci pa e compania Love Forms & System Inc. na Merca. Esaki ta e mesun compania cu a produci e prome buki conmemorativo di 10 Aña Status Aparte.

E idea di e proyecto aki a worde inspira y carga pa Sra Vivian Alberto, Manager di e Departamento Filatelico cu apoyo y cooperacion di diferente persona y instancianan cu a contribui na e realisacion di e buki conmemorativo aki.

E buki conmemorativo Simbolonan Nacional di Aruba a worde produci den tres idioma: Papiamento (color berde), Ingles (color blauw) y Hulandes (color burgundy). E ta uno hopi educativo pa tanto nos hubentud y adultonan.

E ta contene un souvenir vel, un serie di stampia, Prologo, Historia y Decreto di tanto nos Escudo, Bandera y Himno Nacional, Schets y Biografia di Sres. Rufo Inocencio Wever (dfm), Hubert (Lio) Booi (dfm) y Juan Chabaya “Padu” Lampe.

Post Aruba NV kier expresa palabranan di gratitud na tur persona y instancia cu di un manera of otro a contribui na e realisacion di e bunita proyecto aki.
E buki conmemorativo ta obtenibel na e oficina di Post Aruba, Oranjestad.

E bunita souvenir aki no por falta den bo coleccion. Busca esun di bo awe mes, ya cu e cantidad ta limita.

Pa mas informacion tocante e buki conmemorativo Simbolonan Nacional di Aruba por tuma contacto cu Departamento Filatelico di Post Aruba N.V., cu ta situa na J.E. Irausquin plein 9, Oranjestad.

- Advertisement -

DUNA COMENTARIO

Please enter your comment!
Please enter your name here