Home Actividad Especial Preparando di awor caba pa Paranda di Bochincha

Preparando di awor caba pa Paranda di Bochincha

122
0
SHARE
- Advertisement -

ORANJESTAD (AAN): Faltando un tiki mas cu 1 luna, Cruz Cora Aruba ta trahando duro pa e di 6 edicion di Paranda di Bochincha cu lo tuma lugar riba diasabra, 25 di November, 2017. Un parada di truck unda tur persona cu limitacion por participa. Cu e evento aki, Cruz Cora ta purba trece tur e personanan aki mas cerca di comunidad, mustra cu nan tambe tey. Esaki pa pone enfasis riba e Dia Internacional pa Persona cu Limitacion cu ta worde celebra 3 di December.

E concepto di parada di truck a worde inspira pa e “truckersrit” anual na Hulanda, cu ta enfoca riba personanan cu limitacion intelectual.

Na Aruba, Cruz Cora a adapta e idea na tur persona cu un limitacion of otro. Durante e añanan, por a wak participacion di persona sin bista, sin oido, autista, persona cu a sufri trauma fisico y a keda incapacita y persona cu limitacion intelectual.

Clientenan di centronan manera Sonrisa, Trampolin, Funari, FAVI, Ambiente Feliz, Cas Sjabururi y hopi otronan ta tur aña spera cu hopi entusiasmo e dia yega pa bay keiro rond Aruba den truck, pa haci hopi bochincha, decora nan t-shirt y core den truck decora…y e biaha aki cu luz!

Tambe famianan a cuminsa algun aña caba haci costumber di sinta pafor di cas y warda e Paranda di Bochincha yega nan dilanti. Esaki ta worde masha hopi mes aprecia, ya cu pa e clientenan esaki ta un muestra di apoyo pa nan. E mensahe ta yegando cerca famianan: Persona cu limitacion tambe tey, nan ta forma parti di nos comunidad y ban duna nan sosten. Cruz Cora Aruba pesey ta encurasha tur hende pa pone atencion riba e fecha, 25 di November, y para pafor y apoya e grupo aki den nos comunidad, cu merece mas atencion y sosten.

E ruta pa Paranda di Bochincha 2017 ta: Cruz Cora Dakota, Pedro Gallegostraat, Avenida Milio Croes, De La Sallestraat, Rotonde Seroe Blanco, Rotonde ex-Piet’s Soda Fountain, Rotonde Ponton, Santa Helenastraat, Rotonde banda di Wendy’s, subi Boulevard, pasa riba Brug Renaissance, sigui Rotonde Las Americas, Cruzada di Pricesmart, finaliza na Cruz Cora Aruba.

Ta cuminsa line-up ya caba pa 4 pm na Pedro Gallegostraat 12, Dakota. Clientenan por tambe registra for di 4pm. Salida lo ta 5.30 pm pa por disfruta di un Bahada di Solo y yega back Cruz Cora prome cu 8:00 pm.

Cruz Cora ta pidi tur mayor of representante di un persona cu kier participa, pa por fabor yama nos y inscribi na tel. 582-2219 mas pronto posibel. Tambe  ta pidi tur compania cu tin truck of esnan particular pa yama nan pa registra. Mas truck nan por conta cu ne, mas lugar por ofrece e invitadonan. Companianan cu ta interesa pa sponsor, por mail nan na: info@redcrossaruba.com

- Advertisement -

DUNA COMENTARIO

Please enter your comment!
Please enter your name here