Home Politica Proximo gobierno mester entrega 2 presupuesto pa 15 di december

Proximo gobierno mester entrega 2 presupuesto pa 15 di december

120
0
SHARE
- Advertisement -

POR mustrando situacion cu Gobierno di AVP ta laga atras

ORANJESTAD   (AAN): Dialuna partido POR a haci peticion na sr. Gobernador pa cifranan di Departamento di Finansa, pa cual a keda bastante decepciona pa e cifranan cu a bin dilanti di parti Departamento di Finansa. A haya  un documento cu no ta duna hopi informacion pero na mes momento ta alarmante den e sentido cu ta papia di aworaki caba di un Presupuesto 2018 cu no a wordo traha y no a wordo entrega pa un gobierno na mando cu ta cerca di 200 miyon florin. A haci peticion tambe pa mira e situacion actual di 2017 cu ta haya ainda mas preocupante y cual practicamente no a duna ningun informacion riba dje, lider di partido POR sr. Otmar Oduber ta splica mas di e ultimo desaroyonan.

A bisa sr. Informador cu nos ta kere cu den e lapso mas lihe cu ta posibel mester por tin un gobierno nobo cu ta sinta y asumi responsabilidad pa prome di November, caminda cu bo no sa exactamente kico bo ta bay hereda. Tur informacion ta mustra cu enbes di un norma di 0.5% cu CFT a acorda cu gobierno di Aruba y cu tin den e presupuesto di 2017, ta papia di un norma cu ta bay yega rond di 4 – 4.5% pa 2017. Cu ta significa un ‘tekort’ cu lo tin e aña aki ainda cu mester entrega eora un presupuesto supletorio, prome cu entrega e presupuesto 2018. Esaki mester tin un prestamo adicional den dje, pues ta endeuda bo Pais cu mas di 120 pa 140 miyon florin cu ta representa e ‘tekort’ pa e aña aki.

“E ora ey  nos ta  compronde e declaracionnan di miembronan di Gabinete Mike Eman 2 cu a bisa cu e proximo gobierno lo no ta facil y uno instabiel. Mi ta kere e instabilidad aki a wordo crea netamente pa esnan cu pueblo a saca for di gobierno 22 di september.”  A notifica sr. Informador tambe mediante un carta por escrito di un mandato cu nos a haya den nos conseho di partido, cu e proximo gobierno mester ta sinta lo mas pronto cu ta posibel pa di e forma ey por cuminsa asumi responsabilidad pa por entrega 2 presupuesto ainda prome cu 15 di december cu ta esun supletorio pa 2017 y esun di 2018 cu no a ni wordo traha riba dje ainda y no a bay Raad van Advies y ningun otro organo. Tambe a mustra riba e hecho cu e gobierno mester ta un gobierno politico pa por asumi e desicionnan di maneho politico cu mester tuma luga, sr. Oduber a splica.

Pa conclui, sr. Informador a indica cu ta desea pa e siman aki tin un declaracion di intencion entre partidonan cu ta dispuesto  pa traha cu otro. Den esaki a mustra cu lo tin acercamentonan unda cu tin entendi cu partido MEP lo haci e prome paso pa un encuentro. “Nos ta cla pa tin un declaracion  di intencion entre partido MEP y partido POR. Den e declaracion aki lo por tambe inclui e posibilidad di crea un base mas amplio treciendo partido RED tambe cu a haya un asiento durante e ulitmo eleccion.”

- Advertisement -

DUNA COMENTARIO

Please enter your comment!
Please enter your name here