Home General Pueblo di St. Maarten ta bisando cu Samaritan’s Purse a yuda nan...

Pueblo di St. Maarten ta bisando cu Samaritan’s Purse a yuda nan mucho mas compara cu Red Cross

291
0
SHARE
- Advertisement -

ORANJESTAD (AAN): E reaccion aki ta algo cu DIARIO a bin ta ricibiendo ultimo siman for di St. Maarten.  Pueblo di e isla ta hopi agradecido na un solo instancia cu a yega cu tur sorto di yudanza, sosten, y hende cu a pone man na obra pa haci hopi caya limpi, drecha casnan, y reparti cuminda.

No ta trata aki di Red Cross… pero di un grupo internacional conoci como Samaritan’s Purse.

Despues cu Horcan Irma a azota St. Maarten, lagando e isla paraliza cu pueblo den situacion caotico, ta Samaritan’s Purse ta esun cu pueblo di Islanan Ariba ta di acuerdo unanimamente, cu danki na nan awor e isla ta cuminza hala respiro normal.

Samaritan’s Purse ta un organizacion evangelical di yudanza humanitario, cu tin nan mesun avion di carga pa transporta yudanza den forma di emergencia.  Nan ta reacciona na tur hende den situacion di crisis.

Apenas algun dia despues di e desastre di Irma, e grupo aki a yega St. Maarten abordo di nan propio avion DC-8, cu 20 ton di equipo, material y 14 persona cu ta experto pa duna man den desastre.  E avion a bula di North Carolina pa St. Maarten.

Nan a yega cu klechi, shelter di plastico, materialnan higienico, y unidadnan cu ta purifica awa, cu ta suficiente pa sostene 2.000 famia.  Despues a manda mas, pa asina sostene 4.000 famia, y tambe paña, cuminda, y demas material.

Nan avion di DC-8 a entrega carga tambe a yuda evacua par di hende di e isla.

Y pueblo di St. Maarten a tuma nota con e personanan aki tabata dunando un man pa yuda recoge tur sushedad, materialnan di construccion destrui, y mas, pa asina haci caminda mas pasable.

E segundo vuelo a inclui 30 ton di buscuchi di high-energy y esey a yuda hopi debi cu cuminda tabata scars na St. Maarten.  E buscuchinan aki a wordo entrega na Samaritan’s Purse door di World Food Programme, y e avion DC-8 a bula pa Haiti pa piki nan y trece nan pa St. Maarten.

Na St. Maarten, nan a instala equipo portable cu ta converti awa di lama den awa limpi pa bebe.  Te cu awor nan a instala dos sistema, y tin plan pa bin cu mas pa St. Maarten.

Ademas di St. Maarten, nan a manda yudanza tambe pa Turks and Caicos Islands, Antigua y Barbuda.  Pesey na tin como 30 persona den Caribe ta dunando un man.

“Nos ta hopi contento cu tur yudanza cu nos a ricibi aki na St. Maarten, for di tur instancia, incluyendo Red Cross, di Hulanda, yudanza di Curacao y Aruba, pero esun cu mas a impacta sigur riba Isla Ariba ta e yudanza di Samaritan’s Purse”, un ciudadano di St. Maarten a declara.

- Advertisement -

DUNA COMENTARIO

Please enter your comment!
Please enter your name here