Home Comentario Reaccion di Atan Lee Sr.

Reaccion di Atan Lee Sr.

127
0
SHARE
- Advertisement -

No tabata mi intencion di skirbi esaki, pero cierto hendenan no por lanta falso testimonio sin averigua bon prome.

Na prome lugar den nomber di e Comision Nacional Celebracion Fiesta Patronal hopi danki na tur parokianan pa nan participacion y tambe na tur Pastoornan, kendenan conhuntamente a duna nos mama stima un gran homenahe. Tambe na tur medionan di comunicacion.

Na cierto medio di comunicacion nan a baha cu criticanan sumamente sin base ariba cierto puntonan cu no ta coincendi cu e realidad. Na prome lugar e Comision Nacional ta ser forma door di representantenan di tur parokia di nos pais y nan ta ser apunta door di e Pastoornan di e Parokianan.

Nos no ta wak, kende nan ta, peor ainda na cual partido politico nan ta pertenece. Cada hende tin nan opinion y aki nos ta traha na pa duna nos Mama Celestial, Santisima Virgen Mama Maria, nos Patrona stima loke E merece. Kapel di Alto Vista ta keda un lugar Santo y Sagrado pa mayoria di nos hendenan.

Pa 6 aña caba cu e nobena ta ser organisa y tur aña Gobernador, Ministronan, Miembronan di Parlamento ta ser invita pa asisti. Tambe durante e Nobena Nacional, esnan cu ta bai por ta testigo di esaki, nos ta reza pa tur nos sponsernan y Ministernan, kendenan a coopera cu nos pa asina e celebracion por a bira un realidad.

Cada 4 aña despues cu eleccion pa Parlamento tuma lugar, e politiconan eligi o esnan na mando ta ser invita pa ricibi un bendicion especial y e biaha aki tambe esaki tabata e caso. Dia 8 di September invitacion a bai via Señor Secretario di Conseho di Ministro pa tur Ministro y tambe via Señora Griffier interino di Parlamento Jacqueline J. Williams pa tur miembronan di Parlamento. Alavez e comision a publica diferente comunicadonan oficial na unda ta ser menciona cu e  aña, manera ta costumber di cada 4 aña e miembronan di Parlamento lo ricibi un bendicion door di tur e Pastoornan presente.

Señora Evelyn Wever Croes tin 6 aña ta canta den e coro Nacional y su mama señora Mechy Croes Garrido tur aña ta dirigi e coro, no tin cuestion cu ta pa prome biaha.

Den pasado diferente mandatarionan y politiconan a yega di asisti, pero e aña aki ta solamente señora Wever Croes tabata presente como corista tambe.

Tur esnan cu tabata presente ta testigo cu tabata tin mas di 50 stul reserva pa tur e politiconan y si nan bin cu nan famia. Banda di 5 minuut pa 6 a duna ordo pa pueblo tuma asiento, debi pa un transmission via television ta mahos cu e stulnan ta bashi. Politiconan a briya, tur, e otro politiconan tur a briya cu nan ausencia.

Tambe a ser critica color di flor etc., ta keda na pueblo pa manda e color di flor cu nan ta desea y pa colmo e aña aki tabata tin scarsedad di flor, debi na e huelga di Avianca y no tabata tin flor ningun caminda. Comision no por dicidi pa cual ta e color di flor cu pueblo mester manda.

Na momento, e ta pone ariba programa, pa bendiciona politiconan, ami Atan Lee, encarga cu e protocol a yama tur politiconan presente, keriendo cu ainda den publico lo tabata tin politico

presente. Un so a presenta, kende ta señora Wever Croes. Tambe a ser yama pa ricibi un bendicion oficial Miss Aruba Universo Alina Mansur y Miss Mundo Aruba Anouk Eman, pa nan tambe ricibi un bendicion special pa nan participacion proximamente den Miss Universo y Miss Mundo. Nan tampoco tabata presente. Mi a lubida cu na comienso di e misa, di e transmision mi a gradici Su Exelencia mr. drs. Richard Arends, kende a coopera cu transmision a tuma lugar via Tele Aruba.

Ora di cu señora Evelyn Wever Croes a ricibi su bendicion ami Atan Lee, enberdad a menciona posibel Prome Minister di Aruba y mi a bisa tambe cu mi ta spera cu e Comision Nacional lo sigui ricibi e mes un bon cooperacion cu nos a ricibi di Gobierno durante e ultimo añanan.

Na unda nos como Comision a faya? Nos mester a bai busca e tur politiconan cu a ser invita via invitacion oficial y via prensa pa nan bin o nan mester realisa cu nan mester di Señor y Mama Maria pa asina nan por haci un mihor trabow. Nos pueblo, nos Pastoornan, tur siman y dia aki tambe a reza pa Gobiernonan di nos Dioscesis.

Asina hendenan, Arubiano ta purba kibra otro. Religion no tin nada di haci cu politica y mester siña respeta otro. Nunca mi a haci politica, ni e Comision, nos a traha pa nos Mama stima y si e politiconan, kendenan a laga e stulnan bashi ta sinti cu nan no mester di guia di Señor y Mama Maria ta keda na nan.

Mi ta spera cu e caso aki ta bon cla y tur aña, si Dios duna nos bida y salud, nos lo sigui invita e mandatarionan y politiconan, ta keda na nan si nan ta asisti.

Dios bendiciona y proteha e pueblo aki cu completamente enfermo na politica y hasta ta hinka religion den tur asunto.

Boso humilde sirbidor cu no ta laga ningun hende kibre y ta sigui traha pa nos Mama stima, nos Patrona stima, hunto cu Comision Nacional.

 

Atan Lee sr

- Advertisement -

DUNA COMENTARIO

Please enter your comment!
Please enter your name here