Home Cultura “Salsa di Caribe pa Mundo”: un recorido den historia cu Mirto Lacle

“Salsa di Caribe pa Mundo”: un recorido den historia cu Mirto Lacle

35
0
SHARE
- Advertisement -

Salsa: un medio di comunicacion y educacion:

ORANJESTAD (AAN) – Matutino DIARIO a haci un recorido den e trayectoria di Salsa di Caribe pa Mundo, cu sr. Mirto Lacle.

Manera nos tur sa, Mirto Lacle ta un Academico, Investigador y Gestor Cultural, y den un entrevista el amplia riba e tema di Salsa, como medio di comunicacion y educacion.

Durante un charla reciente, na Biblioteca Nacional, sr. Lacle a elabora riba esaki, y awor e ta amplia como cu Salsa tin su historia compleho y suigeneris.

Concepto “Triologia entre musica, canto y baile”.

Kico esaki ta encera? “Loke e concepto aki ta encera cu e tres aspectonan aki tin un link, nan ta forma parti di ‘un ta yama otro’, ta mara na otro. Na momento cu bo ta tende Salsa bo por ta Chines of Italiano, por ehemplo, bo sa cu e ta Salsa. Un di e caracteristicanan di Salsa ta cu tin un Salcero, y e Salcero ta e cantante, pero e ta un portavoz y maestro di ceremonia na e mesun momento. Tin Salcero cu ta sonero. Tur sonero, ta salcero pero no tur salcero ta sonero”, Mirto Lacle a bisa.

Pero kico ta un sonero?

Sr. Lacle a defini esaki: “ E sonero, e salcero, e cantante ta e persona entre coro y coro. E mester por domina su canto, e mester parti’e cu e coro ta canta y ta bolbe bin, e mester tin un espacio fiho pa improvisa.

Cu e sonero tradicional di e musica tropical antiphonal, e coro ta establece e parametro di e metrica y e ritmica. E ta impone un espacio fiho di tempo pa improvisa e compasnan entre coro y coro”, Mirto Lacle a señala.

El a splica cu e solista sonero ta comberti su mes den e otro timbre cu e ta produci ora e ta canta, na nivel melodico.

“Pues ta trata di patronchinan ritmico propio, dentro di e armazon poliritmico total, masha compleho”, Mirto Lacle a subraya.

Esaki segun definicion di Angel G. Quintero Rivera, un musicologo cu tur hende conoce na Puerto Rico y cu a haci e definicion di kico ta soneo.

“E Sonero Mayor di Puerto Rico ta Ismael (Maelo) Rivera. E y Celia Cruz, ‘La Guarachera de Cuba’, ta personahenan emblematico pa scolnan di soneo den e mundo di Salsa. Y nan dos a crea pauta y eherce un gran influencia den hopi salcero di e decada di añanan 70. Pero tin mas…” Lacle a expresa.

Algun di e caracteristicanan cu un bon sonero mester tin ta, entre otro: sonoridad di palabra, su voz, e formato antiphonal, y e uso di Jitanjafora.

Kico ta un Jitanjafora?

“Su definicion ta un creacion poetico constitui pa expresionnan of palabranan carente di significado, inventa, deforma, etc., pero di gran valor fonico y cu ta duna cierto sentido na e texto den su conhunto”, Lacle a splica.

Kico e tematica cu nan ta canta ta?

“Salsa tin un trayectoria largo. Na fin di añanan 60 y durante añanan 70, por bisa cu e ambiente musical ta modifica cu evolucion di un genero cu a distingui su mes, pa su caracter bailable y comercial.

Un otro punto ta cu desde e Revolucion Cubano na 1959, a bin un cambio na Cuba, deriva di su inicionan di un tradicion musical cu ta emigra for di Cuba pa resto di Caribe y Centro America. Un otro punto ta cu e ritmo Salsa, na dado momento, se asienta of radica na Puerto Rico,  y den e Colonia Hispano-Boricua na New York, segun splicacion di Cesar Rondon”.

Y kico Salsa mes?

“Segun e definicion cortico ta e combinacion liber di ritmo y genero diverso di Caribe. Of por bisa tambe cu Salsa ta un movimento di expresion popular cu ta combina diferente genero y ritmo tradicional Caribeño, entre otro: bomba, plena, rumba, guaracha, son, guaguanco, mambo, chachacha. Esaki segun e estudioso musicologo Angel. G. Quintero Rivera. Por bisa tambe cu Salsa ta expresion di un vision di mundo, pasobra e compositornan ta expresa nan vision di mundo, pa medio di e genero musical Salsa, y esaki desde un perspectiva Boricua y Latinoamericano”, Lacle a subraya.

Y kico ta su tematica?

“E tematica por encera emigracion Caribeño, e sentido di identidad, e posicion di hende muher den sociedad, prehuicio racial, diferencia di clase, represion politico, y entre otro, unidad latinoamericano. Esaki segun Aixa Merino Falu”. Pues, esaki ta e nucleo cu sr. Mirto Lacle a expone.

Importancia di divulga informacion:

“E informacion aki ta hopi importante pa esnan cu ta balia Salsa sea profesional of aficionado, por compronde miho kico nan ta balia y con pa sintie. Mi ta pidi e spectadornan keda pendiente di e siguiente ‘Homenahe na Salsa 2’ cu pelicula, canto y baile”, Lacle a conclui.

- Advertisement -

DUNA COMENTARIO

Please enter your comment!
Please enter your name here