Home Actividad Especial Serlimar cu su tradicional accion den barionan ta bay cuminza

Serlimar cu su tradicional accion den barionan ta bay cuminza

60
0
SHARE
- Advertisement -

ORANJESTAD (AAN)—Accion di limpieza den tur nos barionan ta un tradicion di Serlimar, prome cu fin di aña y tradicionalmente tambe e barionan ta uni y ta depende di nos compania estatal Serlimar pa deshaci di desperdicionan, na un manera responsable.

Den un entrevista cu sr. Lionel Croes, vocero di SERLIMAR, pronto e lo difundi informacion tocante e accion cu ta bay tin den diferente bario, entre otronan di e distritonan di Santa Cruz y Noord, como tambe den e bario di Dakota. Riba esaki lo divulga e fecha cu e accionnan aki lo tuma lugar.

Serlimar lo enfoca y demostra un biaha mas riba su compromiso cu nan tin pa yuda e barionan pa tene cas y/of cura limpi, y pa nan por haci uso di e containernan pa deshaci di tur desperdicio di grof pisa na un forma responsable.

Croes a subraya cu e factor “sushedad” ta depende di e comportacion di cada individuo. Hopi biaha a traha riba dunamento di informacion (concientizacion) na comunidad, pero na final ta keda na cada ken pa tuma e responsabilidad pa tene rond di nan cas limpi, y henter Aruba.

“Ainda tin hopi dump ilegal y Serlimar ta monitor esaki. Serlimar ta traha na un forma coordina y ordena, pa tene accionnan di limpieza, pero tin ora ta mescos cu hiba awa pa lama. Nos ta haci un lugar limpi pero despues di un par di siman, ta wak cu e sitionan ta bira un semi-dump ilegal. Tur esaki conhuntamente cu e plan di accion di bario”, e vocero di Serlimar, sr. Croes a subraya.

El a agrega cu Serlimar tin su mannan yen y mester sigui traha pa genera entrada. “Serlimar no ta depende solamente di presupuesto di Gobierno, pero riba su propio forza ta sigui traha riba ideanan innovative, pa brinda servicio di calidad”, sr. Lionel Croes a conclui.

- Advertisement -

DUNA COMENTARIO

Please enter your comment!
Please enter your name here