Home Policial Serlimar kier papia cu cualkier testigo di accident na Cura Cabay

Serlimar kier papia cu cualkier testigo di accident na Cura Cabay

459
0
SHARE
- Advertisement -

Accident pisa

ORANJESTAD (AAN): Dialuna 23 di October algun rato prome cu 12’or di merdia, a tuma luga un accidente unda dos truck di sushi di Serlimar tabata envolvi hunto cu un auto sedan.

Un truck di sushi bahando for di caminda di Brazil, tabata yega na e cruzada banda di Wendy’s Cura Cabay pa asina bira bay rumbo pabao.  E chauffeur a indica cu net e ora ey, tur sistema di brake a stop di funciona.

Consecuencia di esey ta cu e truck a cuminza bira pa tuma e lorada, pero cu e momentum y velocidad, a pone cu el a bay kentel, dal den un Hyundai Accent color blanco den cual tabatin dos dama, y a sigui pusha esaki contra net pa casualidad un otro Truck di Serlimar.

E otro truck aki a evita cu esun accidenta a cay y placha e Hyundai completamente.

Mesora personanan a core bay habri e porta di e Hyundai Accent, pa asina saca e victimanan prome cu e vehiculo pisa por sigui bin abao.

Dos unidad di Ambulans a yega, y mesora a bay cu nan direccion Servicio di Emergencia na Hospital pa chekeo.

Polis a cuminza cu un investigacion pa asina check e declaracion di e chauffeur cu e sistema di brake a faya completamente.

Den un entrevista cu vocero di Serlimar, el a indica cu e chauffeur a wordo poni riba non-actief, pa asina nan haci un investigacion.

No ta conoci ainda kico tabata e motibo di e incidente, pero ya caba Serlimar ta haci su investigacion y na mes momento lo warda rapport di Polis prome cu saca un conclusion concreto di kico realmente a socede.

“Serlimar ta lamenta e sucedido di accidente na Cura Cabay y ta tuma e incidente aki hopi na serio”, vocero di Serlimar Sr. Lionel Croes ta enfatisa. Sr. Croes ta amplia cu Serlimar tin un procedura importante di seguridad cu ta tuma lugar na momento cu tur truck sali pa nan ruta. Tambe cada truck ta cumpli cu sistemanan di seguridad hopi halto unda cu si tin cualkier fayo cu e truck, e lo duna cualkier indicacion inmediatamente.

Investigacion ta sumamente importante y lo mester haci esaki debidamente conhuntamente cu Polis di trafico. Cualkier resultado cu worde demostra pa medio di investigacion, Serlimar lo tuma tur paso necesario pa cu esaki pa asina continua garantiza seguridad na tur momento.

Internamente Serlimar lo tuma pasonan tambe di precaucion pa asina tur trahadornan continua aplica seguridad durante trabao na tur momento, como tambe den trafico y maneho di trucknan di sushi. “Serlimar ta desea pronto recuperacion na e heridonan di e incidente. Tambe nos ta spera cu e tipo di incidente aki no bolbe ripiti”, Sr. Croes ta finalisa.

Serlimar ta pidi si tin cualkier testigo, pa por fabor tuma contacto cu Serlimar na 524-5080.

- Advertisement -

DUNA COMENTARIO

Please enter your comment!
Please enter your name here