Home Impuesto Servicio di Impuesto tin atencion pa hendenan cu ta huur auto cu...

Servicio di Impuesto tin atencion pa hendenan cu ta huur auto cu A-nummer

159
0
SHARE
- Advertisement -

ORANJESTAD (AAN):  E ta algo cu a “explota” den ultimo dos aña na Aruba!  Hendenan particular cu ta ocupa ta huur auto na gran escala cu tanto hende local y cu turista.

Siendo cu na Aruba, ta companianan di Car Rental ta encarga cu esaki, y hasta tin un nummerplaat special “V” pa esaki.

Kico awor?  A resulta cu Servicio di Impuesto di Aruba tin hopi atencion riba e asunto aki, incluyendo esnan cu ta haciendo uso di Social Media pa bende producto, incluyendo Vraag & Aanbod.

Awor cu hopi hende ta haci negoshi via internet sigur tin servicio di impuesto su atencion pa cual ja ta trahando un plan pa atende esaki segun Louanne Gomez-Pieters, directora di Departamento di Impuesto a indica.

E ley di internet no ta regula den detaye, pero loke si ta regula ta e cobramento di belasting.

Unavez cu bo ta negociante y ta haci negoshi di paña, zapato, producto di cabey, celular, makeup kits di e.o. Kylie Jenner, etc, cu ta cosnan cu ta wak ariba socialmedia cu ta worde bendi, den wowo di ley, bo ta worde “mira” oficialmente como un “negociante” pa cual mester bay registra na Belastingdienst y Camara di Comercio.

Pesey e negoshi creciente di huurmento di auto cu plachi di A-nummer ta algo cu no ta cuadra!  Pasobra na Aruba, ta stipula cu pa huurmento di auto bo mester di un vergunning di parti di DPP.  Ademas e autonan mester ta registra na Belastingdienst y nan tin di haya un V-nummer.  Fuera di esey, lo mester paga BBO tur luna.

Pero awendia hopi negoshi ta worde haci cu e huurmento di A-nummer.

Gobierno no ta kita ningun hende di tin un negoshi, pero tur hende mester paga nan “fair share” na e caha di Gobierno.

Gobierno ta mira cu tin competencia inhusto den bendemento riba Social Media.  Articulonan cu tin prijs normal mas halto, pero riba Social Media bo ta haye asina barata pa 50 Florin.

Mester corda cu tin otro negoshinan cu si ta legal, cu si ta paga belasting, y cu tambe ta bende e productonan, sea den Caya Grandi of den e mallnan, cualnan si ta paga nan “fair share”.

Segun señora Gomez, nan ta siguiendo e desaroyo aki di cerca. Nan ta hayando tipsnan for di ciudadanonan cu ta negociante y ta haya cu e bendemento y huurmento ilegal aki ta bayendo for di man.

A bin haya sa cu e asina yama “FIOT Team” ta trahando ariba e asunto aki, y nan tin screenshots y tur cos!  Pues aki algun dia nan lo yega na e adresnan aki pa un control.

Pesey Servicio di Impuesto ta haci un suplica na esnan cu ta haci negoshi ariba Social Media, incluyendo Facebook y cu ta bende semper mesun tipo di producto, mercancia, y auto importa apart riba Vraag & Aanbod, pa bin registra na Belastingdienst pa asina cumpli cu ley riba e tereno aki.

Ta hopi mas facil y lihe cu por cumpra otro productonan, e ta hopi mas facil pa esunnan cu ta haci negoshi bo no mester huur un luga, bo no mester paga utilidad ya cu ta for di bo cas bo ta bende e productonan cu bo ta bende. Y esaki pa un negociante cu si mester paga huur y utilidad ta trece hopi mas gasto cun’e cu esun cu no ta registra.

Belastingdienst ta hayando hopi kehonan di negoshinan cu ta keha cu nan si ta registra netchi manera mester ta. Y di otro banda ta haya hendenan cu ta haci negoshi ariba rednan social of websitenan cu no ta registra na Belastingdienst of Camara di Comercio.

Leynan cu ta vigente ta duna Belastingdienst e bevoegdheid pa actua. Ta trahando riba dje den sentido cu naturalmente, tin un cantidad limita di personal cu por haci e trabao.

E asina yama “FIOT Team” y e team di control ta esunnan cu ta haci sondeo ariba e tereno aki. Segun Señora Gomez, nan ta wak corant, internet, rednan social y nan ta haya tipsnan di negociantenan di pafo. Nan tin un tiplijn di FIOT, cu ta fiot@impuesto.aw caminda cu e tipnan ta drenta cu ta keda registra.

Belastingdienst semper a stimula e clientenan pa registra nan mes, ya cu despues cu Belastingdienst bin pa control, bo ta hayabo cu situacionnan indesea. Despues e negociante lo por hay’e den un situacion cu hopi mas gasto y un situacion indesea ya cu bo ta hayabo cu boetnan tambe acumula, ya cu ta trata di hende cu ta haci negoshi no ta paga belasting deliberadamente y bo ta hayabo cu boetnan cu ta bay acumula cu por yega na sumanan toch basta grandi.

Y esaki ta Belastingdienst ta purba di evita, segun Señora Luenne Gomez- Pieters, directora di Belasting.

- Advertisement -

DUNA COMENTARIO

Please enter your comment!
Please enter your name here