Home Comentario Sra. Mary-Lou de Windt ta splica factornan cu por causa depresion

Sra. Mary-Lou de Windt ta splica factornan cu por causa depresion

43
0
SHARE
- Advertisement -

ORANJESTAD (AAN) – Sra. Mary- Lou De Windt ta sigui splica cu esakinan por ta: factornan fisico, genético, ambiental y hormonal.

Cierto cualidadnan di e persona; p.e. su caracter, falta di habilidad pa regula emocionnan y habilidad pa resolve problema, auto-estima abou, poco capacidad pa enfrenta tristeza y desapunto.

Tambe experiencianan cu ta causa impacto, manera cosnan cu a pasa den niñez of como adulto, perdida di un mayor y trabao, problemanan financiero y di relacion y morto di sernan keri.

DEPRESION CERCA MUCHA Y HOBEN:

For di literatura por saca afo cu un estado di animo depresivo por bin na tur edad.

Depresion por manifesta su mes tambe cerca mucha y hoben y por wordo preveni. Pesey ta di gran importancia pa depresion wordo reconoce na tempo durante infancia. Tin diferencia entre mucha y hoben compara cu un adulto ora ta papia di depresion.

Cerca mucha y hoben depresion por expresa su mes di un otro forma, manera den problema fisico, problema di comportacion, agresividad, desobediencia y problema di siñamento. Y lamentablemente na prome instante esakinan no ta wordo asocia directamente cu depresion.

Sintoma di depresion cerca mucha y hoben hopi biaha ta sconde tras di un otro comportacion, haciendo esaki dificil pa reconoce (depresion scondi/”gemaskeerde depressie”).

Ta existi e posibilidad cu si depresion ta manifesta su mes durante edad jong, e ta ancra su mes den e sistema nervioso cu ta den desaroyo. E proceso di e desaroyo psico-social por wordo seriamente altera door di un depresion. Un otro riesgo ta cu depresion por contribui na comienzo y origen di suicidio, uso di droga y alcohol of un imagen di depresion maniatico.

MALESANAN PSIKIATRICO NA ARUBA:

Esakinan ta entre otro depresion – trastorno bipolar y ansiedad, trauma, psicosis, schizofrenia, demencia, door di maluso di droga y alcohol y ADHD ta, entre otro. e malesanan psikiatrico.

Investigacion di Trimbos Instituut na 2001-2003 a mustra cu esaki, por ehemplo, na Italia ta 8.4% – Merca = 26.2%, Hulanda = 13.4. Aruba tin 9.500 persona cu malesanan psikiatrico = animo, ansiedad y door di maluso di alcohol y droga. Mayoria no ta hayando tratamento. Menos cu 25% = 2.300 persona ta haya tratamento aworaki na Aruba.

Depresion mundialmente ta e malesa psikiatrico cu ta aparece mas. No sa di con. Pero loke ta haci mas impresion ta e malesanan cu trastorno psicotico. Un grupo chikito ta “end up” riba caya y ta haya contacto cu polis y ta bin den prensa. Y esaki ta haci impacto riba e comunidad. Depresion no ta un malesa cu ta haci mas impresion den e comunidad. Mayoria bes ta e cliente of e famia ta esun cu ta sufri mas hopi.

Mas y mas cifra y investigacionnan ta mustra cu no solamente depresion, pero un scale mas grandi di malesanan psikiatrico tin di haber cu factornan genetico y ambiental. Importante ta pa no tene berguensa di busca ayudo. Hopi hende, pa berguenza, ta keda cana rond hopi tempo cu pensamentonan straño, manera pa mata curpa. Si bo ta sinti cu e bida no tin balor of bo tin hopi pregunta of bo animo ta hopi abou, bay bo dokter di cas y busca ayudo. Y locual tambe semper ta importante ta pa tuma e señalnan na serio, tanto cerca mucha, hoben y adulto. Ta importante pa no neglisha cualkier cambio den e estado di animo. Para keto na esakinan y busca ayudo profesional cerca e dokter di cas, psicologo, psikiatra of un ortopedagogo.

Hiba un estilo di bida saludable y crea un bon ritmo y balansa den bo bida diario tambe ta hopi importante pa un bon salud mental. Mayornan mester percura pa e mucha y hoben haya suficiente descanso. Come saludable, balansa y varia, haci suficiente movecion por duna’bo energia y vitalidad y por juda’bo pa enfrenta cualkier cambio den bo estado di animo.

- Advertisement -

DUNA COMENTARIO

Please enter your comment!
Please enter your name here