Home General The Ritz Carlton cu dos espacio destina pa mamanan por combina nan...

The Ritz Carlton cu dos espacio destina pa mamanan por combina nan trabao y dunamento di lechi di pecho

46
1
SHARE
- Advertisement -

ORANJESTAD (AAN): Hotel The Ritz Carlton hunto cu Directie Volksgezondheid (DVG) y Fundacion Pro Lechi Mama (PLM) recientemente a duna un presentacion na tur manager, mama cu ta na estado y mama cu ta duna nan yiu lechi pecho, riba e Ley di Lechi Pecho y Trabao. Prome cu e ley a worde introduci na 2007, 50% di e mamanan tabata stop di duna lechi di pecho ya cu nan no por a combin’e cu trabao y awe 10 aña despues ainda e no ta bay facil.

E lactatation consultant (specialista di Lechi materno) Minouche Lopez a splica cu Ritz Carlton ta un hotel relativamente nobo y desde comienso nan a traha hunto pa mira con por facilita e mamanan den e miho forma pa nan por haci uzo di e ley.

E ley ta stipula cu durante e prome 9 lunanan di e baby, cada mama por haci uzo di maximo 25% di orarionan cu e ta traha, pa dedica na lechi di pecho. Tin 3 opcion: E mama ta bay cerca e baby pa dun’e ‘live’. Un mama ta scoge pa laga su yiu worde treci na trabao pa dun’e lechi pecho of e mama ta haci uzo di e posibilidad pa pomp na trabao. Asina ta percura cu e produccion di lechi ta keda manteni y lo evita problema di salud pa e mama. Señora Altagracia Lampe di Human Recources na Ritz Carlton a logra cu awe tin 2 area nobo special pa pomp.

Creando un situacion ideal pa e mamanan cu kier duna pecho tin bentaha pa e doño di trabao tambe. E mama su productividad lo ta mas halto. E ta mas motiva pa bay trabao y ta mas flexibel cu menos stress. E mama lo ta menos AO paso su yiu tin menos chance di bira malo.

E ambiente na trabao ta hopi mas positivo y e ta un bon imagen pa e hotel mes cu ta focus pa mira e baby un parti di e famia di Ritz Carlton. Investigacion ta mustra mundialmente cu pa cada $1 cu ta investeer den un empleado pa stimula duna lechi di pecho ta haya $3 back. E ta clave cu un mama cu ta haya cooperacion di su doño di trabao, ta bay e extra miya.

Cu e dos kolfruimtes nobo ta nifica cu no mester tin motibo pa no duna un baby su lechi pecho. Organizacion Mundial di Salud ta boga pa tur mama duna su yiu 6 luna pecho so y pa sigui te cu e mucha tin por lo menos 2 aña y preferiblemente te dia cu e mucha mes kier stop.

Den ley ta para cu e doño di trabao mester percura pa tin un luga adecuado p’e mama. E mester ta un espacio comodo y priva, cu tin awa, coriente y un frigidaire pa warda e lechi. Mirando e resultado final por bisa cu esaki ta trata di un iniciativa bunita y ta di spera cu mas compania haci esaki.

Pro Lechi Mama ta bay pa haci un campaña den futuro pa elogia compania cu ta “breastfeeding  friendly”. Ya cu awendia casi tur mama ta traha e ta keda un echo cu tur baby merece di haya e miho regalo cu nan por haya di nan mama.

- Advertisement -

1 COMMENT

DUNA COMENTARIO

Please enter your comment!
Please enter your name here