ORANJESTAD (AAN): Situacion di turismo ta mustra di ta slow e dianan aki. Y pesey e dianan aki bo ta haya masha hopi oferta mes di Hotelnan, pa por yena nan cambernan. Riba internet mes, bo ta haya hotelnan grandi cu tin prijs pa camber menos cu $99 pa anochi.
Restaurantnan luhoso tin oferta special pa purba di atrae localnan pa yena nan mesanan bashi.
Pa e motibo ey mes, rumor a cuminza core cu algun Hotel local ta buscando forma pa reduci e gasto enorme cu nan tin riba salario. Esey ta inclui e pensamento, cu un Hotel local tin pensa di aumenta e horario di trabao te na 9 ora pa dia, pa asina nan por haya 2 dia off.
Te ainda no tin confirmacion di e plan aki, pero empleadonan ta hopi preocupa riba esaki. Es mas, nan ta convenci cu no obstante kico Gobierno ta propaga, en realidad situacion di turismo ta dificil e momentonan aki.
Debi na destruccion di Horcan na otro islanan, awor mey-mey di siman Aruba ta hayando hopi barco crusero extra cu a dicidi na tuma ruta di Southern Caribbean pa duna nan pasaheronan un alternativa den nan viahe. Esey debi cu ainda Islanan Ariba y tambe US Virgin Islands no por ricibi cruseronan.
Pero un trahador den Caya Grandi a laga sa, cu tanto bal cu tin 5 barco crusero mara den Waf… keto bay caya grandi ta bashi. E no ta compronde ta unda e turistanan ta bay, of si acaso nan ta baha di e barco mes.
