Concierto Dominical Donny Lacle
ORANJESTAD (AAN): Riba diadomingo dia 1 di october a tuma luga e Concierto Dominical Donny Laclé, den Biblioteca Nacional na Playa.
Un biaha mas e comision organisador a logra hinca un programa hopi varia den otro, cu dos grupo “nobo”
Asina e concierto a cuminsa cu presentacion di Vivian Lampe, compaña pa Denzil Tromp, un hoben di 14 aña , riba conga, cu a sinti su mes masha honra di por presenta hunto cu Vivian. Y hunto cu nan, un musico cu semper ta cla pa duna u man, Carlos Bislip riba wiri. Nan a presenta musica “Aura”, “Arubanita”, “Mi Esposa” y naturalmente tambe pieza di Padu: “Foi dia mi a mirabo “y” Abo so”. Un aplauso grandi a recompensa nan pa nan bunita presentacion. Y tempran caba algun pia a kishiki.
Durante un pausa cortico, e caha di glas a pasa rond. Nos ta gradici esnan presente cu na un manera generoso a haci un donacion. Fin di november diferente hoben talento musical lo ta contento di por ricibi, por medio di e donacionnan un scholarship pa yudanan paga nan lesnan di musica.
Di dos actuacion tabata na encargo di un grupo nobo: Duo Max y Julia. Max Hassel bon guitarista y cantante ta conoci cerca mayoria di nos y tambe na hopi pais den exterior. Julia Wever, durante 20 aña miembro di e coro di misa San Francisco , awo tin dos aña ta forma duo cu Max. Julia su bonita stem a encanta e publico. Tambe su interaccion cu e public tabata tremendo. Y nan a hasta pone diferente pareha subi pista. Nan repertorio tabata hopi varia, di diferente compositor, entre otro: “Toch mi sa”, “Si mi cama por a papia”, “Cunucu di Seit”, “En mi Viejo San Juan”.
El Nuevo Sabor Musical a cera e concierto.: Tur 6 tocador tabata integrante di diferente banda aki na Aruba y nan a dicidi di bin hunto pa pone ambiente pa e publico. Y berdaderamente na a pone esey diadomingo, pa nos den Café Musical na biblioteca E publico a canta manera un coro y a los e pianan riba e sonido y ritmo di entre otro:“Ami so den boso”, “Sabor a mi”, ”De ti enamorado”, ‘’Bin cerca mi”, “Pilar”. Comision organisador ta mira bek riba un otro concierto exitoso y ta gradici grupo Vivian Denzi y Carlos; Duo Max Y Julia y El Nuevo Sonido Musical, pa nan dushi presentacion.
E MC a gradici e publico cu a bin presencia e concierto aki y cu a contribui cu nan donacion. E siguiente Concierto Dominical lo tuma luda dia 29 di october 2017.
