Home Suceso Venezolana ta relata con e tin cu prostitui na Aruba pa por...

Venezolana ta relata con e tin cu prostitui na Aruba pa por sobrebibi

385
0
SHARE
- Advertisement -

ORANJESTAD   (AAN): Den un articulo cu a keda publica riba e website http://elcooperante.com, unda cu un Venezolana, ta conta di su experiencia na Aruba como un prostitua. Dicon e ta haci’e y pa ki meta. Esaki ta un tipico caso di traficacion di hende cu frecuentemente ta presenta den nos pais. Algo sigur cu nos mescos cu e otro paisnan den Caribe ta combatiendo

Segun e articulo, e grave crisis economico, politico y psicologico ta kibrando cu e parametronan social di e ciudadanonan Venezolano. E necesidad a hiba cu e muhenan ta traspasa e fronteranan no solamente geografico, sino mental, ofreciendo nan curpa na clientenan den varios ciudad na mundo pa logra haya placa pa mantene nan famia cu ta sufri di hamber y miseria.

Venezuela a cuminsa exporta su muhenan, ya no como reinanan di beyesa, sino como profesionalnan di sexo, convirtiendo nan den un producto di e modelo economico fracasa cu e dictadura di Nicolas Maduro a impone.

Daniela tin 26 aña, el a nace na Caracas den un di e barionan popular di e capital. El a studia te cu e prome aña den e universidad ya cu na un momento simplemente, e no por a sigui, debi na e situacion economico cu e tabata someti, e revista Vertice a publica.

Cu dos yiu pa mantene y un mama enfermo, no a kede nada otro pa sali busca un trabao cu ta permiti’e enfrenta e inflacion cu ta azota Venezuela. Lamentablemente e alternativanan laboral disponibel no ta permiti’e burla e miseria cu su famia ta pasando aden.

“Un dia mi tabata buscando un trabao den e negoshi di un amigo den CCCT y diripente un meneer cu sa bay na e negoshi aki y a acercami bisando, cu e curpa cu mi tin, dicon mi no ta bay busca un trabao den e “agencia di modelo.” Mi a puntre: Con? Modelo ami? Y e homber a bisami: Si, abo ta sirbi…. Mi a pidie e adres y a bay di biaha pa wak di kico e ta trata y nan a ofrecemi e trabao cu a permitimi haya e placa pa alimenta mi famia,” el a bisa e periodista Maibort Petit.

Daniela ta confiesa cu hunto cu otro seis mucha muhe nan ta biaha pa Aruba trimestralmente pa presta servicio como damanan di compania y prepago riba e isla. “Nos ta yega, e encargado ta ricibi nos, kende ta hiba nos na apartamentonan priva, algun tin camara di grabacion cu ta parce un estudio di television, otronan ta bon muebla hopi bunita y tin bebida pa e clientenan. Tin otro servicio cu ta presta directo na e cambernan di e zona hotelero,” e ta bisa.

“Nos cu nos cuminsa cu e trabao, nos ta bay den cambernan diferente, bon sexy y nan ta pidi nos cu nos tin cu complace e clientenan y haci tur loke nan ta pidi nos. Tin hombernan generoso cu ta papia diferente idioma, cu por lo general nos no ta compronde. Por pasa un ora of mey ora, of loke e servicio dura y despues nos mester baña pa ricibi e otro,” el a menciona cu e por ricibi te hasta 10 cliente den un solo anochi.

“E prome dia cu mi a haci e trabao aki, mi a sinti mi mes sushi, manera un pida carni cu hende por mishi pa algun cen. Mi a sinti asco di mi mes y mi kier a sali core bay, pero despues mi a pensa e rason di mi decision tabata e hamber di mi famia. Tin un momento caminda mi a bisa mi mes: of mi ta haci’e, of mi ta muri di hamber. Y mi a yena mi mes di forsa pa sigui. Awendia mi por paga pa e cuminda di mi famia, e servicionan y hasta ta restami placa pa cumpra paña, sapato y pa hiba mi yiu muhe wak pelicula,” el a conclui.

Aruba ta e meca di proxenetanan Venezolano cu a mira den e crisis y den e abundancia di muhenan dispuesto pa  bende  nan curpa na dollar, e formula perfecto pa yena nan saco sin esfuerso propio. Ta hopi ta e hobennan cu ta cay den mannan di explotadornan sexual cu ta cobra e clientenan tarifanan halto pa e servicionan presta pa e mucha muhenan aki, cu na final, solamente ta ricibi un porcentahe inferior na 20 porciento di e ingreso cu nan ta genera.

 

- Advertisement -

DUNA COMENTARIO

Please enter your comment!
Please enter your name here