Home Hudicial 5 aña di prison exigi pa asalto arma na Hulpbestuurkantoor na...

5 aña di prison exigi pa asalto arma na Hulpbestuurkantoor na Savaneta

116
0
SHARE
- Advertisement -

ORANJESTAD (AAN):   Ayera mainta e sospechosonan homber: R.P., I.P., M.H. y D.A. a presenta den Corte pa e caso penal cu Ministerio Publico a cuminsa contra nan. Fiscal a condena totalmente loke e grupo aki a haci y a exigi 5 aña di prison pa cada un. Por a constata cu e grupo ta nenga total di lo a haci e asalto arma.

Asalto Arma

E grupo ta wordo acusa cu riba 31 Maart 2017 a haci un asalto arma na e oficina auxiliar di Gobierno na Savaneta. Despues di a haci e asalto arma, caminda nan a bay cu 13 mil florin, nan a keda warda e auto cu ta recoge placa di e compania di seguridad y a ataca e miembro di seguridad cu a sali. Nan a logra bay cu e auto, un Sentra den cual tabatin dos caha di placa cu a caba di recoge na e oficina auxiliar na Santa Cruz.

Ta asina cu dos di e asaltantenan tabata sinta na e parada di bus, haci manera ta bus nan ta warda y na otro banda di caminda tabatin dos otro sinta den un Toyota Yaris color preto.

Ora e Sentra a yega y e guardia a baha, e dosnan na e parada di bus a bay atak’e y e otro dos di e Yaris tambe a baha pa yuda.

E guardia a duna di conoce na Polis cu el a sinti un pusha cu forza contra e auto y e asaltantenan a purba coy su arma di trabou. Nan a dal’e dos biaha riba su cabez. Nan a bringa cun’e y a los un tiro cu su arma.

Den sala di Corte ayera tabata presente, representante di Departamento di Impuesto (SIAD), kende a entrega demanda di daño contra e grupo. El a exigi e 13 mil florin cu a horta na e oficina auxiliar na Savaneta y e dos cahanan di placa, cada un cu mil florin. En total 15 mil florin. E cahera cu a bira victima di e asalto arma tambe tabata presente.

Persecusion di polis

Riba 31 di Maart 2017, dos agente di Polis a tende tiro y a bay na e sitio. A mira hendenan den auto y notifica Central di Polis. A reconoce H. como esun cu tabata arma y los un tiro. A sigui 5 persona cu lo tabata den e auto. Nan lo a bay subi den dos auto un Yaris y un Sentra. A sigui tras di e Sentra. Na Sabana Basora a detene un persona. Ambos agente a reconoce e persona como H. como esun cu lo a tira.

A surgi un persecusion na altura di Pos Chiquito, tras di un Nissan March. Polis a mira tres a baha for di auto y drenta mondi. Tabatin un buskeda y un persona a bisa cu tin hende scondi den su cura y a ofrece 1000 florin. A detene e persona aki cu ta R.P. Na Sabana Basora a detene otro dos.

Sospechosonan ta nenga

Hues a puntra I.P. kico a pasa e dia ey. Promer e no kier a bisa nada na Polis. Segun I.P. e tabata core auto y un persona a core subi e auto y pidi’e pa yuda pasobra hendenan kier bati’e. I.P. a ripara cu tabatin hendenan ta core su tras. Tabata H. y el a core cun’e riba un distancia y despues bis’e pa baha. Segun I.P., e no sa nada di e asalto arma. Hues a mustra cu tin video di seguridad y por a mira I.P. Segun I.P. e persona ey no t’e. El a splica cu el a haci tratamento na pia y no por cana sino cu un kruk. Hues a bisa cu hustamente esey ta loke a reconoce I.P., pasobra e tabatin problema pa cana. Hues a bisa tambe cu R.P. cu ta primo di I.P., a reconoce riba video. Segun I.P. su primo ta gaña.

Hues a mustra tambe cu R.P. a bisa cu el a papia cu doño di e auto cu I.P. tabata core y cu e doño a bisa cu ta I.P. tabata esun indica pa core e auto pa yuda esnan cu a haci e asalto arma.

Na dado momento a bay over na mira imagennan riba computer di un camera di seguridad. Hues a sigui bisa cu Polis a reconoce R.P. tambe. Nan a hay’e scondi den un jardin. Segun R.P. el a bay bende marihuana y a topa H. El a bisa cu e deal no a bay bon y a keda spanta. El a bay busca H. y splik’e cu deal di droga no a bay bon. Segun R.P. e tabatin marihuana cun’e. El a bisa cu e Sentra tabata su auto. Segun Hues, Polis a bisa cu a sigui e auto Sentra y a mira R.P. a Sali core bay for di e auto. Segun R.P. e no tin nada di haci cu asalto arma. El a bisa cu e tabatin marihuana cun’e. Segun R.P., el a mira H. baha y core. E ora ey e tambe a Sali for di auto y core.

Hues a remarca cu na Polis R.P. a declara otro. Segun R.P., ta Polis a pone cos cu no ta cuadra.

  1. a bisa Hues cu e no tin nada di haci cu asalto arma. El a bisa cu e tabata cu R.P. cu e asunto di droga. El a ripara cu tin hende nan tras y a bisa R.P. para. El a core bay y e hendenan a sigui su tras.

Hues a remarca cu riba confrontacion di potret a reconoce H. como un di e asaltantenan.
E dos agentenan di Polis den preparacion cu a presenta na e sitio di asalto a reconoce H. Nan a bisa cu nan a mira H. baha for di e Sentra.

Pa loke ta D.A. e tambe ta para riba cu e no tin nada di haci cu e caso. Hues a remarca cu hasta e ruman di D.A. a reconoce.

Exigencia di fiscal

Fiscal a bisa cu e ta haya legalmente proba cu e grupo aki a haci e asalto. El a bisa cu awor tur ta bisa cu nan no a haci nada, pero tin imagennan riba video y tambe tin dos agente di Polis cu a reconoce algun. Fiscal a condena totalmente kico e grupo aki a haci. El a exigi 5 aña di prison pa cada un.

Tratamento di e caso aki lo sigui diaranzon caminda Hues lo bay bisa ki dia lo por spera sentencia.

 

- Advertisement -

DUNA COMENTARIO

Please enter your comment!
Please enter your name here