Home Hudicial 8 y 12 aña di prison exigi pa duo cu a tira...

8 y 12 aña di prison exigi pa duo cu a tira diferente persona

151
0
SHARE
- Advertisement -

Tambe un a tira persona cu a para pelea formal na Entertainment Center  

ORANJESTAD (AAN) –  Ayera mainta tanto B.A. como C.K. a haya un baño di awa frieu ora nan a scucha e exigencia di Fiscal di 8 y 12 aña di prison pa intento di mata diferente persona.

ACUSACIONNAN

E acusacionnan cu Fiscal a presenta contra e homber B.A. y C.K ta:

— Riba 14 Februari 2017, mas o menos 11.50 di anochi, B.A. a purba mata e homber H. door di tira riba dje.

— Riba 30 di April 2016, B.A. y C.K. na Entertainment Center Dakota, a tira riba e homber V. Fiscal ta haya cu intencionalmente y premedita kier a haci maltrato severo riba V.

— Riba 25 Januari 2017, B.A. y C.K. premedita a tira riba e hombernan M., S. y P.

— Riba 13 Februari 2017, a purba mata e homber F. door tira riba dje.

— Entre 30 April 2016 – 13 Februari 2017, C.K. tabata den posesion di arma diferente biaha.

E homber V., kende ta esun cu a wordo tira 4 biaha, a presenta cu su abogado mr. Carlo, tabata den Corte caminda a presenta un demanda di daño di 50 mil florin. E abogado mr. Carlo a splica un ke otro. Despues nan a bay. E otro personanan perhudica no a presenta.

TIRA HOMBER 4 BIAHA

Hues a mustra cu dia 30 April 2016, tabatin pelea na Entertainment Center y despues tiramento. Polis a bay na e lugar aki y a bin haya sa cu e homber V. a wordo tira. V. a bisa cu tabatin un evento na e lugar y despues di e evento, el a mira cu un conoci di dje tabata wordo maltrata pa un grupo di homber. El a bay cu su ruman y a mira un persona benta abou. El a dicidi di hala e bringadornan for di otro. Un di e bringadornan a bisa cu e no sa cu kende e ta mete y pa hala for di dje.

E homber riba suela a logra bay. V. a wordo menaza pa no meta pasobra e ta tir’e. Dos di e hombernan tabatin cabey rasta. A logra cu nan stop y hasta el a duna B.A. man. Ora e tabata cana bay su pick up, el a mira un grupo di homber para ey banda. Diripiente un homber a sali for di e grupo y bay riba dje. E por a mira cu e homber tabatin cabey rasta y a tira 4 biaha riba dje. El a sinti dolor na curpa y core bay. A resulta cu el a sufri diferente tiro na barica, heup y pols.

El a wordo interna den hospital. Ta asina cu V. a reconoce B.A. como esun cu promer a menaza y C.K. como esun cu a tir’e. El a bisa despues cu el a ripara C.K. a corta cabey. Segun C.K. e tabatin cabey pero no rasta. Parce cu henter e problema cu a surgi pa e pelea na e lugar ta door di un amiga cu B.A. ta cun’e. E homber G., kende a resulta e victima cu e maltrato formal, a bisa cu B.A. y C.K. a bringa cun’e.

El a bisa cu B.A. tabata tira palabra p’e relaciona e amiga di B.A. y na dado momento el a sinti sla duro tras cabez y a perde conocemento. Hues a mustra cu tin diferente testigo cu a bisa cu B.A. y C.K. a bringa cu e homber. Tambe Hues a mustra cu tin testigo ta mustra cu C.K. a tira riba V. E arma ta un pistol Cal. 32.

Segun C.K. no ta asina cu el a bringa den grupo. El a remarca cu ta parce cu tur cos ta manera un set up contra dje. B.A. a bisa cu e tabatin problema cu G. y ora nan a sali for di e lugar nan a bringa. Segun B.A. el a tende cu G. kier a dal’e y el a bay riba G., dal’e dos mokete mand’e for di tino. El a dal tambe un otro persona. Segun B.A. e dos rumannan V. a bin no pa para nan sino bringa cu nan. Segun B.A. e no a menaza V. y no a bis’e cu e lo tir’e. Segun B.A. el a duna V. un man y despues a bay cas.

TIRAMENTO NIGHT CLUB

Na Madiki, na un night club riba 25 Januari 2017 lo tabatin tiramento. Un auto shinishi lo a pasa tira. E homber P. a bisa cu e ta kere cu ta B.A. lo a tira riba dje pasobra nan tin problema. Tambe cu C.K. lo a tira. Polis a haya huls di balanan y tambe impacto di bala riba un auto. Ta sospecha cu un arma 9mm a wordo usa pa tira. Fiscal a bisa Hues cu e hobennan a tira riba otro y no kier haci denuncia contra otro. Tanto B.A. como C.K. ta para riba cu nan no a tira.

Riba 13 Februari 2017 na altura di un bar tabatin otro tiramento. Atrobe a menciona un auto cora y ta sospecha cu ta B.A. Ta asina cu auto riba cual a tira, a haya 4 impacto di bala. Fiscal a pidi pa declara tanto C.K. como B.A. liber pasobra ni tin ningun prueba confiabel.

TIRAMENTO RIBA CAS

Riba 14 Februari 2017, un brommer a dal contra un auto y e chofer di brommer lo a los 3 pa 4 tiro y bay laga brommer atras. For di yamadanan di telefoon cu Polis a scucha por a compronde cu e homber F., cu ta forma parti di un gang di Madiki mientras cu B.A. y C.K. ta di un otro gang di Madiki. F. lo a bisa cu ta B.A. y C.K. a tira riba e homber H. y herid’e. H. ta forma parti di e gang di F. B.A. a desmenti di a tira. Segun B.A., nan a tira riba dje pero e no a tira. El a bisa cu un brommer a pasa y a bolbe y tira riba nan cas na Madiki. Segun B.A. el a core bay na pia.

Hues a mustra cu C.K. y B.A. a wordo condena na 2015 pa posesion di arma di candela. Ta parce cu nan a haci e delitonan aki den nan tempo di prueba.

PROBLEMA ENTRE DOS GANG DI MADIKI

Fiscal a bisa cu parce cu tabatin problema entre dos gang di Madiki. Ademas di e tiramento na Entertainment Center na Dakota, B.A. y C.K. a tira riba otro personanan.  Segun Fiscal, tin diferente declaracion di miembronan di gang contra otro y Fiscal no kier usa nan pasobra nan no ta confiabel.

TIRA HOMBER 4 BIAHA

E caso di tiramento riba 13 Februari 2017, Fiscal a pidi pa declara B.A. y C.K. liber pasobra F. a haci denuncia pero no por confia declaracion di otronan. Den e caso di Entertainment Center, 30 April 2016, G. a haci denuncia contra B.A. El a bisa cu el a sufri un sla y perde conocemento pero no sa kende a dal’e. El a haya un bati formal. Tin diferente testigo cu a mira con e maltrato formal aki a sosode.

E rumannan V. a bay para e pelea y B.A. lo a menaza V. di lo tir’e dos biaha. Despues di e pelea, V. a wordo tira y V. reconoce C.K. Fiscal a bisa Hues cu e ta bay tras di declaracion di testigo independiente o sea personanan cu no tin nada di haci cu e caso. Testigonan a reconoce C.K. como esun cu a bringa tambe cu G. y tambe cu C.K. a tira. Haya nan culpable di maltrato di e homber G. Un agente Polis a notifica di a scucha 4 tiro. G.K. ta bisa cu e no tabata cu B.A. pero testigonan independiente ta bisa cu nan tabata hunto. Polis a haya 3 huls y dos bala Cal. 32.

Polis a conclui cu riba distancia cortico a tira riba V. y minimo 3 biaha. Tin testigo cu a reconoce C.K. como esun cu a bay busca arma y tira V. E victima V. a duna descripcion di esun cu a tir’e cu ta mustra riba C.K. El a sufri tiro na pols y mester a haci operacion di biaha. E tabatin 4 herida di tiro cu ta cuadra cu loke Polis a bisa cu a scucha 4 tiro. Ta asina cu V. a reconoce B.A. como esun cu a menace di lo tir’e pero ta C.K. a tir’e. Fiscal ta haya C.K. culpable di intento di mata.

TIRA NA CLUB NOCTURNO

Fiscal a mustra cu riba 25 Januari 2017, tabatin e tiramento banda di un club nocturno. A haya auto cu 4 impacto di bala. Hende a bisa cu ta un auto cora a pasa tira. Esnan di e auto M., S., P, a bay check rond y a mira e auto aki para bou di un mata di kwihi. Un hende cu tabata para banda di e auto a tira riba nan atrobe. Na un cas na Madiki a haya 11 huls y a haya impacto di bala riba diferente cas. E huls ta di un pistol 9 mm.

NFI constata cu e huls cu a haya 3 Januari 2017 den un caso di tiramento ta cuadra cu esun cu a haya 25 Januari 2017. Na opinion di Fiscal, ta un persona cu ta forma parti di un gang di Madiki a usa e arma 3 Januari 2017 pero no a haya e arma aki. Fiscal a mustra cu B.A. lo a bay bishita e persona na KIA. Tin testigo a bisa cu esun cu a tira riba e auto ta C.K. y cu esnan den e auto tambe a tira bek. Esaki na opinion di Fiscal ta haci C.K. culpable di intento di mata riba tres hende den e auto.

Door di falta di prueba el a pidi pa declara e sospechosonan di e caso di tiramento riba 13 Februari 2017 liber.

Fiscal a sigui cu e ta haya proba cu C.K. tabatin arma durante 30 April 2016 y 13 Februari 2017.

TIRA MOTOCICLISTA

Fiscal a mustra cu riba 14 Februari 2017, B.A. lo a tira riba homber H. cu tabata riba un brommer. Ta asina cu tabatin un accidente entre un brommer y un auto. E chofer di brommer lo a los algun tiro y a laga e brommer atras y core bay na pia. Tin testigo a mira esaki. Riba cas di B.A. a wordo tira. Fiscal a mustra cu NFI (Instituto Forence Hulandes) a conclui cu e balanan 9 mm cu a haya na e accidente ta di e mesun arma. H. cu tabatin herida di tiro no kier haci denuncia. F. lo a bisa cu ta C.K. y B.A. a tira riba H. Nan a sigui su tras den auto y ora e brommer a dal, nan tir’e. Parce cu un rato promer H. lo a tira riba nan y a core bay y a accidenta. El a sufri 3 tiro. Fiscal a conclui cu ta B.A. a tira riba H. E ta haya B.A. culpable di intento di mata.

DEMANDA DI DAÑO

Pa loke ta e demand di daño cu V. a entrega, Fiscal ta haya cu e demanda material cu ta algo mas di 38 mil florin no admissible. E ta haya cu mester haci un caso civil pa esaki. E parti di daño inmaterial cu ta algo mas di 11 mil florin, e ta pidi Hues pa aproba esaki contra C.K.

CASTIGO EXIGI

Fiscal a bisa cu e ta haya B.A. culpable di e violencia publico riba 30 di April 2016. Dia 14 di Februari 2017 el a core tras di un brommer y tira diferente biaha y herida e homber H.

Fiscal a mustra cu B.A. no ta desconoci. Na 2015 caba el a wordo condena pa posesion di arma na 12 luna di prison di cual 4 luna ta condicional cu un tempo di prueba di 2 aña. Apesar di esaki B.A. ta bay atrobe usa arma durante tempo di prueba.  Fiscal a exigi 8 aña di prison pa B.A. kitando e tempo cu e ta sera den KIA.

Pa loke ta C.K., Fiscal ta hay’e culpable di a tira riba 30 April 2016, e homber V. 4 biaha. Fiscal ta haya C.K. culpable di dos intento di mata caminda e tabatin arma. A tira V. kende a bay para un pelea caminda nan tabata bati formal un homber.

Despues C.K. ta tira 11 bala riba auto den cual tabatin tres persona cu ta forma parti di e otro gang di Madiki. Fiscal a mustra cu C.K. tambe a wordo condena pa posesion arma na 18 luna di prison di cual 6 luna ta condicional cu 3 aña di prueba. Apesar di esaki C.K. ta bolbe tira den tempo di prueba. Fiscal ta tuma C.K. na malo y a exigi 12 aña di prison.

Tratamento di e caso aki a dura hopi largo. Hues awor lo bay studia e caso pa dentro di tres siman dicta sentencia.

 

- Advertisement -

DUNA COMENTARIO

Please enter your comment!
Please enter your name here