Home Parlamento A invita tur instancia concerni pa cuminza atende nos problemanan social for...

A invita tur instancia concerni pa cuminza atende nos problemanan social for di raiz

28
0
SHARE
- Advertisement -

Parlamentario Hendrik Tevreden, fraccion di MEP:

ORANJESTAD (AAN) – Parlamentario Hendrik Tevreden, Parlamentario di Fraccion di MEP, a declara den conferencia di prensa Dialuna, cu Aruba ta den un crisis social y cu e problemanan cu tin no ta un percepcion pero nan ta real, mas di loke nos tur por kere.

Den e cuadro di pasonan cu mester tuma pa yega na e raiz di e problema y wak con por yuda soluciona of baha esaki, nan a yama un encuentro cu e departamentonan den nan totalidad, pa asina sa specificamente, cual ta e leynan cu mester wordo cambia y cual ta esnan cu mester atende cu nan cu mas urgencia.

“Nos por a compronde cu algun profesional nan mannan ta mara pa nan por haci nan trabao, of nan no tin suficiente conexion cu otro departamentonan, y nos kier integra esakinan. Nos kier purba di duna advies na gobierno pa centraliza cuido, pero drecha tambe, a traves di leynan con e sistema ta funciona y con e profesionalnan por yuda e victimanan mas lihe posible”, e parlamentario a subraya.

El a trece dilanti cu aworaki den nos pais tin un trahador social pa 19 scol. “Esaki ta un señal hopi drastico y alarmante, pasobra un trahador social solamente nos tur sa cu no por cubri 19 scol”, el a subraya.

E parlamentario a agrega cu su fraccion ta dispuesto pa trece e cambionan y esey ta e politica cu nan a bin trece dilanti y cu nan ta practicando tambe, y pueblo por ta sigur cu nan lo trata di pone esaki como urgencia, como punto principal, maske cu nan ta procesonan cu ta tuma un caminda un poco largo pa cana, lo haci tur esfuerzo pa atende esaki mas lihe posible.

Encuanto e cambionan cu mester haci den ley of iniciativanan nobo di ley tabata tin un pregunta di prensa, si e problema por ta sinta tambe cu na Aruba tin leynan pisa cu no ta wordo aplica.

Esaki den sentido cu tin indicacion cu Aruba conoce un ley di castigo di bida largo, pa crimen premedita of excesivamente impactante, pero esaki no ta wordo aplica. Ta parce cu Curacao a yega di aplike den pasado, y cu na Aruba tambe tabata tin un caso hopi aña pasa.

E parlamentario den su contesta a reitera cu e parti di castigo ta bin na final di e red. E punto ta cu mester enfoca prome cu yega asina leu cu un persona ta wordo castiga, mester haci algo pa evita cu tin victima di abuso. Pues e proceso mester cuminza cu duna ayudo y preveni.

Tevreden, refiriendo na e caso en cuestion, a subraya cu e mucha a fayece cu un edad di cinco aña, pero aparentemente e abuso a cuminza tuma lugar hopi prome.

“Kico mi kier bisa ta cu nos por concentra en berdad riba ley maximo, bida largo si of no. Pero kico a pasa den e proceso na cuminzamento ora cu algo sosode, cu alarma wordo bati, cu un denuncia wordo poni. Bo ta haya hopi instancia, tur riba tereno social, etc., y ta bin na conocimento cu nan a denuncia esaki basta tempo caba, pero e ora ey tin un caminda cu nos ta pega”, e parlamentario a subraya.

Eynan mester mira si mester fortifica e leynan, si mester reemplaza leynan anticua, y prome cu tur cos reforma e cadena aki pa evita cu ta dura asina largo cu consecuencianan devastador, cu bida di hende ta bay perdi a base di maltrato y di e sistema cu no ta bon poni den otro.

Un remarca cu DIARIO a haci ta cu na DAS, e Trahador Social Enid de Kort cu sosten di algun colega, kier introduci un proyecto cu ta regarda henter e famia pa traha riba problemanan for di raiz. Esaki e dama a bin ta papia di dje den prensa pa mas cu dos aña largo, pero e minister encarga e momento ey, por ehemplo, no a mustra ningun interes.

Aki e parlamentario a menciona cu pesey e reunion na cual e fundacionnan y instancianan concerni a wordo invita pa bin na mesa, puramente pa saca afo unda nan ta pega y con Parlamento y Gobierno por yuda y duna sosten pa ehecuta e plannan cu nan tin, na bienestar di nos pais.

- Advertisement -

DUNA COMENTARIO

Please enter your comment!
Please enter your name here