Home Parlamento Academia di Ley ta un resolucion y e ta ancra den programa...

Academia di Ley ta un resolucion y e ta ancra den programa di e proximo gobernacion!

166
0
SHARE
- Advertisement -

Parlamentario mr. Bikker a acentua:

ORANJESTAD (AAN) – Den conferencia di prensa di Partido POR, Plataforma e Forza Nobo, di nos redaccion a haci un pregunta na mr. Andin Bikker, den direccion di e proyecto Academia di Ley.

Esaki den sentido cu for di Universidad di Aruba, cu ta e Instituto Academico unda un opleiding di tal magnitud mester ta di wordo imparti, no ta sali ningun informacion pasobra riba nan mes, no tin nada concreto. Alomenos no ainda.

Parlamentario mr. Bikker a contesta cu na su opinion, e diferencia aworaki ta, cu tin otro ambito. T’asina cu Academia di Ley ta un resolucion pasobra den encuentronan interparlamentario ya no ta papia mas di mocion sino di resolucionnan entre parlamentonan.

“Nos a acorda esaki riba mi propuesta. Mi mes a redacte na Januari 2004, unda nos acorda entre e parlamentonan di Aruba, Curacao y Sint Maarten cu nos ta institui un Academia di Ley.

Sinembargo, ora bo no ta den gobernacion ta e ministernan encarga cu husticia y educacion lo mester a pone como prioridad den nan maneho, pero den e caso aki ‘nos tur sa cuanto cariño e minister di husticia tin pa mi persona’ y mi ta kere cu awor cu nos ta bay asumi e responsabilidad gubernamental, esaki ta un prioridad ancra den nos acuerdo di gobernacion, anto e ora ey automaticamente lo bay haya e atencion debido y nos ta bay duna contenido na un di e resolucionnan interparlamentario”, mr. Bikker a acentua.

Parlamentario mr. Bikker ta haya cu e proceso aki ta hopi facil pa ehecuta, pasobra normalmente pa bira un hurista cu tin experticio pa traha leynan, e mester sigui un post Academie Opleiding despues cu e gradua como meester. Esaki ta un estudio di dos aña na Hulanda, pero na Aruba nos no conoce e dimension di Union Europeo cu nan leynan specifico y door di esey nos leynan ta un tiki mas simple, pa por eherce e materia di traha ley.

El a subraya cu ora e ta mira su Alma Mater di tempo cu el a studia Ley na Universidad di Amsterdam, den part time el a haya curso pa traha ley comparable cu esnan cu nos tin, den un lapso di seis luna.

Esaki kiermen cu despues di trabao e hurista ta bay opleiding. Bikker ta kere cu, cu cooperacion di cualkier Universidad y Academia di ley mes na Hulanda, mirando cu ta un par di profesor tin experticio riba e area aki, por coordina esaki via Universidad di Aruba tambe, pa nan por bin duna les akinan. Tambe awor cu tin e facilidad di media cu por uza E-learning, entre otro, e ta bay ta relativamente. E boluntad mester tey, Bikker a remarca, y e proyecto mester ta ancra den un programa di gobernacion, cu den e caso aki, e ta den dje.

 

- Advertisement -

DUNA COMENTARIO

Please enter your comment!
Please enter your name here