Home Cultura Actualmente tin 36 edificio cu seyo como monumento proteha

Actualmente tin 36 edificio cu seyo como monumento proteha

19
0
SHARE
- Advertisement -

ORANJESTAD   (AAN): Tur hende ta entusiasma cu e proceso di seyo. Yvonne Webb-Kock, directora di Departamento di Monumento ta conta cu actualmente 36 edificio tin un seyo, entre nan edificionan di Gobierno y di Monumentenfonds.

E siguiente fase ta e proteccion di e casnan cu ta di propiedad di nos hendenan mes, cu ta particulier y ta premira cu esey lo pasa den e siguiente periodo pa traha riba e proteccion di nos casnan den propiedad priva.

Tin nan tur prepara caba. Ta warda tin cu warda pa un sistema di subsidio tambe bin, pasobra bo no por implementa un ley riba un propiedad di un hende sin cu bo ta bisa cu por sikiera yuda nan cu algo chikito bek.

Segun Webb-Kock, tur ley ta cla. Loke falta ta e maneho di subsidio y Departamento di Monumento no ta encarga pa maneha e placa. Tin cu bin un sistema cu por yuda un doño cu tin un propiedad priva. Ta implementa un ley pa kita e hende su propiedad priva pa comunidad, of bienestar general, e ora mester stipula cuanto placa lo bay yuda pa drecha e edificio. E lo ta un suma simbolico pasobra e edificio ta keda propiedad di e doño. E edificio no ta bira di Gobierno. E edificio no ta bira di Monumentenzorg. E ta keda di e doño y e ta keda pa e herederonan tambe.

Webb-Kock ta ripiti hopi biaha, pero kier pone enfasis cu e prome yama pa drecha su edificio, ta e doño di e cas.

A studia diferente posibilidad caba. A studia esun di Hulanda, Corsou, Belgica. Tin diferente cu a studia caba. Tin proposicionnan cu a entrega, pero tin un organisacion cu mester bay maneha e parti di e subsidio. Actualmente Departamento di Monumento, ta e departamento tecnico y tur asunto general y no ta encarga cu e parti financiero di cuido di monumento. Ta prepara e maneho, pero pa implimenta e maneho, e mester ta un otro organisacion cu por duna placa na den forma di un fiansa. E mester haya aprobacion di Banco Central, cu un organisacion por ta ta haci e funcion di un bank instelling. Esey ta algo cu e minister nobo lo tin cu bay dicidi, con e lo kier bay implimenta e su maneho riba e parti di subsidio pa nos monumentonan.

Monumenten bureau ta cla cu su parti di descripcion pa e proteccion huridico di tur e 300nan cu falta ainda pa proteha, pero no por proteha algo y e ora ey bo no por yuda bek. No ta intencion tampoco cu tur 300 mester wordo proteha di biaha, pasobra Gobierno lo no tin e placa pa bay yuda cu tur e casnan aki. Por bay poco poco y mientras tanto Departamento di Monumento ta yuda gratuitamente pa guia e doño con pa mantene su cas pa e wordo wanta cu tin biaha cu hasta solucionnan hopi barata y facil pa haci. Por ehempel, tin e casnan di cunucu y hopi biaha ta traha un vloer su dilanti manera un porch. Ta cosnan cu ta pega na e edificio existente. Den e nachi, awa ta drenta y por daña e muraya tin biaha. Si yena e gleuf, e mantencion ta mira menos, pasobra awa no ta drenta den e murayanan.

Mayoria di nos edificionan bieu, ta traha di koraalsteen. Nan ta hopi sensibel pa awa.

Otro solucion hopi facil ta, por ehempel na banda di cas of rond di cas, bo ta pone e grijs den angulo contra e edificio pa awa no keda para riba e edificio. Solucionnan no hopi caro, pero cu por yudabo pa mantene y conserva e edificio.

No ta papiando e ora ey di bay restaura y trece bek den su estado original ainda. Eseynan si ta un aanpak un tiki mas riguroso. Pero tin maneranan cu bo por mantene e cas cu e ta keda conserva pa e siguiente generacionnan, no cu hopi placa.

Nos tin e tradicion di verf cas den temporada di pasco. E temporada mas malo cu por verf e cas, pasobra ta tempo di awasero. Miho tempo pa verf cas ta ora cu awa no ta cay. Pero ta e tradicion di haci full e cas limpi, di drecha cas, di drecha cura, ta e partinan cu ta influencia cu a scoge hopi biaha e luna di December pa verf. Palo mester wordo geverf cada 3 aña. Si warda 7 pa 10 aña pa verf palo, e ora bo tin cu pone palo nobo na e edificio. Bo por a preveni esey, door di busca bo bleki di verf pa bo verf’e. Ta sugerencianan cu ta duna na doñonan di cas cu nan mes por haci. Nan no tin cu bay na ningun compania di construccion grandi pa haci e cosnan chikito aki pa conserva e cas pa e siguiente generacion y pa nan mes tambe tin un luga hopi bunita y agradabel pa biba.

 

- Advertisement -

DUNA COMENTARIO

Please enter your comment!
Please enter your name here