Home Politica Andin Bikker a enfoca riba e importancia di un programa di gobernacion...

Andin Bikker a enfoca riba e importancia di un programa di gobernacion di un coalicion

150
0
SHARE
- Advertisement -

ORANJESTAD (AAN) – Den conferencia di prensa di partido POR, Plataforma e Forza Nobo, mr. Andin Bikker a subraya e tema: “importancia di un programa di coalicion”.

E parlamentario, na manera di preambulo, a subraya cu den 24 aña Aruba no a conoce un gobierno di coalicion pero mas cu tur cos, segun Bikker, el a bay cinco eleccion y e lider di POR, Otmar Oduber, a bay seis, loke ta nifica cu nan tin 20 aña hunto den politica, pero esaki ta e prome biaha cu, concretamente, partidonan cu lo forma gobierno di coalicion, a bin cu nan programanan di gobernacion cu ta visiblemente mustra cu nan a consulta ampliamente, no despues di formacion, pero di antemano,  e preocupacion cu ta reina den e pueblo di Aruba.

VISION 17-21: E BIJBEL DI GOBERNACION:

Asina a yega na e vision 1721. Aworaki a yega na e programa di gobernacion, Andin Bikker a splica. Esaki ta nan Bijbel awo, y den dje ta importante pa subraya e relevancia di un programa di gobernacion, pasobra specificamente e pueblo por sa kico e gobernacion aki ta nifica pe, den aspectonan concreto.

SEGURIDAD: Bikker a indica cu e gobierno nobo lo aumenta seguridad den pueblo, comercio y turismo cu ta areanan specifico y tangible, pero cu ta ausente pa hopi aña, y ta un di e temanan cu a wordo identifica ora cu POR a consulta gremionan y comunidad y ademas, mirando tur e acontecimentonan di e ultimo añanan aki unda e indice di inseguridad ta sumamente halto.

ACADEMIA DI LEY: POR a pasa un mocion pa bin cu un Academia di Ley. Esaki pa e huristanan cu no tin e opleiding pa nan traha of haci cambionan den ley. E motibo pa esaki ta cu e leynan na Aruba ta hopi anticua y mester wordo moderniza, entre nan, e reconocimento di diploma medico di nos yiunan di tera cu ta bay studia den nos region. Esaki den e area di Salubridad.

SISTEMA DI FINANCIAMENTO NOBO: Bikker a subraya cu nan lo bin cu sistemanan di financiamento nobo manera “Crowd Funding” unda por yega na capital di riesgo ora di cuminza un negoshi, cu no tin garantianan y cu mester di fondo pa por concretiza ideanan comercial. Esaki ta un dimension nobo pa aruba su sistema comercial.

Tambe ta bay stimula reduccion di e interes di hipoteca. Andin Bikker a señala cu nan a constata cu personanan vulnerable, netamente esnan cu ta paga hipoteca riba cas social tin biaha por bay hasta un interes di 10 pa 11 porciento, mientras cu e interes mundial ta entre 1 y 2 porciento. Na Alemania ta hasta negativo y casi nan ta paga bo pa fia placa.

STRUCTURACION DI DEBE PERSONAL: Esaki ta un ley cu na Hulanda, ya caba ta vigente for di varios aña. Diahuebs mes, den e debate di Tweede Kamer, den nan programa di gobernacion a dedica hopi tempo pa splica ampliamente, pakico nan ta kere cu tin hende cu a cay den un spiral di debe. Bikker a expresa cu na Aruba tin hopi y e motibo ta cu nan ta entrada ta abao di e bestand minimo rekeri pa sobrevivi. Bikker a subraya cu na Aruba e salario minimo ta 1700 pa luna, mientras cu bestand minimo pa un mayor cu un yiu, ta 2600 florin. Hopi hende akinan ta cay, sea cu nan kier of no, den un spiral di debe pasobra nan entrada no ta yega pa subsisti den e economia actual di nos pais. Pesey ta necesario pa duna nan un di dos oportunidad manera nan a introduci na Hulanda, y cu aworaki nan a amplie den nan programa di gobernacion y na Aruba esey tine tambe.

VIVIENDA SOCIAL: E minister di infrastructura saliente, den ocho aña no a traha ni un cas vivienda social nobo, mientras cu e tin riba diez mil persona cu ta wardando pa mas cu ocho aña caba y hasta mas cu esey, pa haya un vivienda social. Lamentablemente, segun Bikker, e Gabinete Eman den tur su añanan di gobernacion no a logra traha ni un cas social, al contrario nan a hereda 68 cas di e gobierno prome cune y nan a pronk cune.

SERVICIO FAST FERRY: Bikker a bolbe toca e asunto di proyecto Fast Ferry cu nan kier establece entre e Islanan di Bonaire y Curacao, cu ta algo cu desde 2012 tin esfuerzonan ta tumando lugar pa logre, durante e encuentronan interparlamentario, conhuntamente cu Hulanda y parlamentonan di Curacao y Sint Maarten specificamente.

RESUMIENDO: E plan di gobernacion aki ta hopi detaya demas di 40 pagina, cu tin un contenido unda tur ambito ta wordo trata y tur area cu nan a detecta den nan vision cu pueblo ta preocupa pe y cu nan ta bin cu solucionnan concreto.

- Advertisement -

DUNA COMENTARIO

Please enter your comment!
Please enter your name here